DILI,MJ-Segunda-feira 22 Abril 2025 Sua-Eselénsia Ministru Justisa hola-parte iha Konsellu Ministrus (KM) hodi dekreta Lutu Nasionál iha territóriu Repúblika Demokrátika Timor-Leste tomak, durante semana-ida sai nu’udar sinál tristeza ba Sua Santidade, Papa Francisco nia mate, iha sala sorumutu Prezidénsia Konsellu Ministrus, Palásiu Governu, Díli.
“Períodu Lutu Nasionál hahú iha tuku 10 dadeer iha loron 22 fulan-abríl no remata iha meia-oite iha loron 28 fulan-abríl” Mídia Gabinete Ministru Justisa, asesu rezultadu sorumutuk extraordináriu nian iha komunikadu imprénsa ninian.

Durante períodu Lutu Nasionál, Bandeira Nasionál tenke hasa’e to’o klaran de’it iha edifísiu públiku hotu-hotu, inklui embaixada, konsuladu no reprezentasaun sira seluk Estadu nian iha estranjeiru, no mós iha ró sira Estadu nian.
Sua Santidade Papa Francisco mate iha loron 21 fulan-Abríl tinan 2025, tuku 7:35 dadeer iha nia rezidénsia, iha Sidade Vatikanu.
Governu rekoñese katak “hanesan devér Estadu nian, lori povu timoroan nia naran, hatudu sentidu gratidaun no rekoñesimentu ne’ebé boot, hodi presta omenajen ida ne’ebé merese ba Lider boot Igreja Katólika nian”.

Iha komunikadu ne’ebé fó-sai horisehik, loron 21 fulan-Abril, Governu, hodi nia naran rasik no hodi povu Timoroan nian naran hato’o “sentidas kondolénsias ba Igreja Katólika, ba Koléjiu Kardeál sira-nian, ba povu Arjentinu no ba sarani sira hotu iha mundu tomak,” ba “Sua Santidade Papa Francisco ninia mate, lider espirituál ida ne’ebé ho influénsia boot tebetebes ba umanidade, defensór ne’ebé lakole ba sira ne’ebé vulneravel liu no promotór dame, justisa no fraternidade nian entre povu sira.”