DILI,MJ-Sesta-feira 4 Abril 2025 Sua-Eselénsia Ministru Justisa, Dr. Sérgio de Jesus Fernandes da Costa Hornai kontinua lidera diskusaun kona-bá projetu dekretu Lei Rejime Jurídiku Bens Imóveis ba domíniu públiku no privadu estadu, iha sala Kafetária, Ministériu Justisa, Nú. 47, Rua-Justisa, Colmera, Díli.
Objetivu prinsipál hosi diskusaun ne’e, maka atu kompleta no halo andamentu ba lei nú. 13/2017 kona-bá nain ba rai. Aleinde ne’e, dekretu lei ida ne’e, atu sai hanesan baze ba Governu hodi halo regularizasaun ba implementasaun Domíniu Públiku no Privadu Estadu.

Ministru Justisa fundamenta, projetu dekretu Lei ne’e, atu atribui títulu ba komunidade. Nune’e mós sei atribui ba Estadu. Tanba estadu iha direitu maka iha artigu 8 no 9 hosi Lei 13/2017. Primeiru Bens imoveis Domíniu Privadu Estade no Segundu mak Bens imoveis Dominio publiku Estadu.
Iha Bens Imoveis Domíniu privadu Estadu mak sai propriedade ne’ebé Estadu Português no Indonesia husik hela iha Timor-Leste maka hanesan: Ospital, Eskola, Merkadu no seluk tan. Nune’e mós Bens imoveis Domínio público Estado mak hanesan: Tasi-Ibun 50 metros, mota no mota ninin, estrada no estrada ninin, semitériu.
Ministru Justisa esplika Diretór sira tenke sai nu’udár na’in ba projetu ida ne’e, fasíl atu interpreta, fasíl atu kontribui hanoin ba malu no fasíl atu aplika diploma ida ne’e. Tanba ne’e, Diretór Nasionál Juridiku no Lejislasaun (DNAJL), Dr.Nelinho Vital ho ekipa tékniku sira halo ezersísiu, oinsa bele kompleta diploma ne’e.

Importansia hosi diploma ida ne’e, Sua-Eselénsia Ministru Justisa, Dr. Sérgio de Jesus Fernandes da Costa Hornai informa ba funsionariu sira kontinua halo diskusaun iha semana ida ne’e nia laran molok submete ba Konsellu Ministru.
Iha diskusaun ne’e, partisipa hosi Diretor Jeral, Terras no Propriedades, Defensor Públiku Jeral, Dr. Câncio Xavier no Diretor PCIC, Dr. Vicente Fernandes e Brito, Xefe Gabinete Ministru Justisa, Dra. Albertina da Kruz Santa no mós Xefe Gabinete Sekretáriu Estadu Terras no Propriedades no mós asesor Nasional no Internasional sira.
Purtantu iha loron Tersa-feira 01 fulan Abril 2025, Sua-Eselénsia Ministru Justisa, Dr. Sérgio de Jesus Fernandes da Costa Hornai lidera diskusaun kona-bá projetu dekretu Lei Rejime Jurídiku Bens Imóveis ba domíniu públiku no privadu estadu maibé sidauk finaliza.