DILI,MJ-Tersa-feira 11 Marsu 2025 Sua-Eselénsia Ministru Justisa, Dr. Sérgio de Jesus Fernandes da Costa Hornai, hala’o enkontru ho Vise-Konsul, Embaixada Reinu Unidu, Nigel Greetham hamutuk ho nia delegasaun sira, iha sala sorumutu Gabinete Minsitru Justisa, Nú. 47, Rua Justiça, Colmera, Díli.

Objetivu hosi reuniaun ne’e, atu fahe informasaun entre Ministériu Justisa no Embaixada Reinu Unidu kona-bá Sistema judisiál Timor-Leste, prosedimentu krime sira, hanesan krime kategoria públiku no krime semi públiku. Nune’e mós halo abordajem kona-bá kna’ar hosi Orgaun Polísia Kriminál sira hanesan Polísia Sientifika Investigasaun Kriminál (PCIC sigla portugés) no Prokuradoria Jeral Repúblika nu’udar autiridade sentral hodi reprezenta estadu ba interese komum.
Iha reuniaun ne’e mós diskute kona-bá kooperasaun bá iha área kapasitasaun ba rekursu humanu, liu-liu formasaun bá iha Guarda Prizionál no pesoál Polísia Sientifika Investigasaun Kriminál (PCIC sigla portugés) ba parte investigasaun krime transnasional hanesan ciber krime.

Sua-Eselénsia Ministru Justisa, Dr. Sérgio de Jesus Fernandes da Costa Hornai, akompaña hosi Diretór Nasionál Asessoria Juridiku no Lejizlasaun (DNAJL), Dr. Nelinho Vital, Diretór Nasionál Servisu Prizionál no Reinsersaun Sosiál, Delfio Soares Alves no Asesor Tékniku Gabinete Ministru Justisa.