DILI,MJ-Tersa-feira 04 Marsu 2025 Sua-Eselénsia Ministru Justisa, Dr. Sérgio de Jesus Fernandes da Costa Hornai hala’o reuniaun ho reprezentante espesial Sekretária Jeral Organizasaun Nasoéns Unidas (ONU) ba Violénsia Kontra Labarik, Sra. Najat Maalla M’jid, hamutuk ho nia komitíva, iha sala sorumutu Gabinete Ministru Justisa, Nú. 47, Rua Justiça, Colmera, Díli.

Ministru Justisa agradese ba reuniaun ida ne’e importante tebes, tanba Timor-Leste liu-hosi Nonu Governu Konstitusionál, buka esforsu relasiona ba kompromisu Internasional iha área fortalesimentu ba protesaun labarik sira. Tanba Timor Leste ratifika ona konvensaun protokolu internasionál ligadu ba protesaun labarik iha setór justisa.
“Ami buka no koopera besik ho Prokuradór Jerál Repúblika nu’udar reprezentante espesiál estadu ba asuntu direitu penál no sivíl kona-ba adosaun kompromisu internasionál balun ne’ebé Timor-Leste ratifika ona iha konferénsia internasionál sira.” Ministru Justisa hateten bainhira reuniaun ho reprezentante espesiál Sekretária Jeral Organizasaun Nasoéns Unidas (ONU) ba Violensia Kontra Labarik, Sra. Najat Maalla M’jid.

Ministériu Justisa mós atensaun másima ba krime internasionál sira ne’ebé labarik sira dalaruma bele sai alvu kona-ba esplorasaun ne’ebé kontra lei no kontra prinsípiu internasionál sira.
“Ami komprometidu tebes atu halo protesaun ba labarik sira no ami haree perspetiva ida kona-ba oinsá atu halo justisa juvenil, liuliu ba labarik sira ne’ebé tuir lei nasionál iha kódigu penal, katak labarik sira ne’ebé ho idade 16 mai kraik labele simu responsabilidade kriminal ka imputavel ba krime” Ministru Justisa fundamenta.
Timor-Leste dezeja iha programa Sentru Juvenil ba programa rehabilitasaun labrik sira. Tanba iha mos krime sira hanesan violasaun seksual labarik bele sai vítima ka envolve iha krime sira ne’ebé iha sirkumstánsia balun.

Timor Leste iha koordenasaun forte iha setor justisa hanesan; Tribunál Repúblika, Prokurador Jeral Repúblika Defensor Públiku no mós Orgaun Polísia Kriminal sira, Sosiedade Sivil hodi bele kampaña ka dessiminasaun ida ne’ebe la kotu ba medida kombate kriminalidade sira.
Ministru Justisa orgullu bo’ot ba reprezentante espesial Sekretária Jeral Organizasaun Nasoéns Unidas (ONU) ba Violensia Kontra Labarik, Sra. Najat Maalla M’jid, Sua-Eselénsia Vise-Ministru ba Opersionalizasaun Ospitais, Flávio Brandão, Prezidente INDDICA, Dinora Granadeiro ho ekipa.