DILI,MJ-Sesta-feira 14 Fevereiru 2025 Ministériu Justisa liuhosi Sua-Eselénsia Ministru Justisa, Dr. Sérgio de Jesus Fernandes da Costa Hornai, atribui fasilidade eletróniku ba levantamentu kadastrál ba Diresaun Jerál Terra no Propriedades hodi haforsa servisu levantamentu rai hosi Nasionál to’o Munisípiu, edifísiu sentral, Ministériu Justisa, nú. 47, Rua Justiça Colmera, Díli.

Objetivu hosi distribui ekipamentu teknolojia eletróniku ne’e, atu responde bá difisiénsia sira ne’ebé maka durante funsionáriu sira hasoru iha Diresaun Jerál Terra no Propriedades no atu tékniku sira halo levantamentu rai hosi Nasionál to’o Munisípiu ho lalais.

Ministériu Justisa atribui ekipamentu sira maka hanesan; komputador destop 50 resin, laptop 10 resin inklui ekipamentu sukat rai ne’ebé hanaran drome 1, Leica tipu 6516 iha 2 no Leica 6508LPV 2, kontroler 1, antena Amenal 1 no eksternal 1.
Akizisaun ekipamentu informatika no ekipamentu drome sukat rai nian ne’e, maihosi Orsamentu Jerál Estadu (OJE) tinan fiskál 2024, ne’ebé aloka ba Diresaun Jeral Terra no Proporiedade iha kategoria kapital menor ho montante $ 2. 490. 400.
Ministru Justisa fundamenta, utiliza ekipamentu sira ne’e, hodi halo atendimentu lalais ba sidadaun sira no mós sidadaun estranjeiru sira ne’ebé maka hela iha teritóriu nasionál Timor-Leste, kooresponde ba servisu administrativu ba iha Ministériu Justisa liu-liu bá diresaun Terra no propriedades.

MINISTRU JUSTISA HUSU BA FUNSIONARIU UTILIZA EKIPAMENTU ELETRONIKU ESTADU HO KUIDADU

Sua-Eselénsia Ministru Justisa, Dr. Sérgio de Jesus Fernandes da Costa Hornai husu ba funsionáriu sira atu utiliza ekipamentu eletróniku estadu hodi trata kona-bá servisu levantamentu kadastrál ba Diresaun Jerál Terra no Propriedades ho kuidadu.
“Ohin ita fehe ekipamentu ne’ebé sosa ho osan estadu ninian, maibé osan ida ne’e ho valor signifikadu tebes, husu utiliza sasan estadu. Tanba osan sosa ho povu ninian, sasan ne’e povu nian, utiliza ba iha interese ema barak ninian, ida ne’e maka ita nia dezeju, ida ne’e maka ita nia hakarak, ida ne’e maka ita nia jestaun, ida ne’e maka ita nia obrigasaun hodi halo sasan sira ho kuidadu,” Ministru Justisa hateten liuhosi nia diskursu.

Ministru Justisa fundamenta, maske uitoan ba, maibé komesa halo servisu hodi hakonu no konfiansa ba komunidade sira. Iha munisipiu ho responsabilidade ne’ebé nakonu ho vizaun no koñesimentu, atu asegura servisu sira. Nune’e mós halo kontrolu ba diresaun tutela hodi bele hatan moveis ka inmoveis bele la’o di’ak.
Iha serimónia distribui ekipamentu refere maka hanesan, Sua-Eselénsia Vise-Ministru ba Fortalesimentu Institusionál, Dr. Paulo Manuel da Silva dos Remédios, Diretór Jerál Polítika Justisa, Honorio Aureliano Soares Magalhães, Diretór Jeral Terra no Propriedade, Lúcas António da Costa no dirijente sira seluk hosi Ministériu Justisa, Nasional no Munisipiu sira inklui tékniku sira iha Ministériu Justisa.