DILI, MJ- Sesta-feira 17 Janeiru 2025 Sua-Eselénsia Ministru Justisa, Dr. Sérgio de Jesus Fernandes da Costa Hornai, hala’o enkontru ho Diretóra Ezekutiva Programa Monitorizasaun Sistema Judisiáriu iha Timor Leste (JSMP, siglá Inglés), Ana Paula Marçal hamutuk ho ekipa, iha sala sorumutu Gabinete Ministru Justisa, Nú. 47, Rua Justiça, Colmera, Díli.
Objetivu hosi enkontru ne’e, atu hametin parseira ne’ebé durante iha ona ho JSMP, nu’udár sosiedade sivil ne’ebé halo servisu iha área justisa nian liu-liu bá Ministériu Justisa. Nune’e mós JSMP aprezenta relatóriu hosi atividade monitorizasaun ba servisu Tribunál, Prokuradoria no Defensoria Públiku nian, inklui nota pareser jurídika balun relasiona ho proposta lei no dekretu lei ne’ebé Ministériu Justisa prepara hanesan, proposta lei estabelesimentu Ordem Advogado Timor-Leste (OATL), proposta lei Kódigu Registu Sivil nomos proposta lei kona-ba Liberdade da Religiosa.

Sua-Eselénsia Ministru Justisa Sua-Eselénsia Ministru Justisa, Dr. Sérgio de Jesus Fernandes da Costa Hornai ho Diretóra Ezekutiva Programa Monitorizasaun Sistema Judisiáriu iha Timor Leste (JSMP, siglá Inglés), Ana Paula Marçal hala’o diskusaun kona-ba implementasaun hosi artigu sira hosi Kódigu Penal, liu-liu ba aplikasaun pena a favor komunidade.
Nune’e mós asegura direitu sidadaun sira, oinsa maka halo protesaun ba direitu humanos, asesu ba iha justisa, asesu ba iha justisa sosial no halo koñesimentu ba iha direitu propriedade, direitos intelektuál, direitu propriedades moveis no inmoveis.

Iha enkontru ne’e, akompaña Sua-Eselénsia Ministru Justisa, Dr. Sérgio de Jesus Fernandes da Costa Hornai maka hanesan; Diretór Nasionál Assesoria Juridiku no Lejizlasaun (DNAJL), Dr. Nelinho Vital, Diretór Jerál Politika Justisa, Honorio Aureliano Soares Magalhães no mós Diretóra Ezekutiva Programa Monitorizasaun Sistema Judisiáriu iha Timor Leste (JSMP, siglá Inglés), Ana Paula Marçal ho nia ekipa.