Sekretáriu Estadu Terras no Propriedades (SETP), Sr. Eng. Jaime Xavier Lopes, M. Eng. Hamutuk ho ekipa delegasaun ne’ebé foin lalais ne’e hala’o vizita servisu ba iha Korea Sul, konsege uza tempu halo vizita mos ba iha edifisiu GEOMEXSOFT & GITT Korea ne’ebé mak tuir planu atu mai fo apoiu formasaun no kapasitasaun ba funsionariu Tekniku Terras no Propriedades inklui moderniza mos sistema informasaun kadastru iha Timor-Leste.
Objetivu hosi vizita ne’ebé SETP hamutuk ho ekipa hala’o ba edefísiu GEOMEXSOFT & GITT atu bele hato’o sentimentu orgullu no agradese ba ekipa GEOMEXSOFT & GITT ne’ebé durante ne’e halo serbisu makas hodi realiza workshop kona-ba “Sistema Informasaun Rai Timor-Leste” iha Timor-Leste iha fulan outobru 2024.
Aleinde SETP Apresia mós serbisu no esforsu Geomexsoft Korea ho nia ekipa ne’ebé maka realiza ona survei iha area pilotu iha DTPSC Munisipiu Liquisa no DTPSC Munisipiu Dili hodi halo levantamentu dadus no planu estabelese baze de dadus ne’ebé diak iha serbisu terras e propriedades nian.
Maske nune’e, parte husi ekipa Geomexsoft Korea no GITT halo mós aprezentasaun kona-ba rezultadu survei ne’ebé maka halo iha fulan Dezembru 2024. Iha aprezentasaun ne’e Geomexsoft Korea no ekipa informa ba Sua Exélensia SETP, Sr. Jaime Xavier Lopes, M. Eng. katak dadus mapamentu ne’ebé Timor Leste iha kuaze iha diferensia boot entre Munisipiu no Nacional ho nune’e persiza tebes atu bele halo melhoramentu ba dadus mapamementu ne’ebé terras e propriedades iha.
Geomexsoft Korea mós informa katak iha fulan Marsu tinan 2025 Geomexsoft Korea sei fornese formasaun & kapasitasaun ba funsionariu Terras e Propriedades hodi haklean kuñesementu iha area GIS (Geographic Information System) no Data Base nian. Formasaun ne’e sei kobre tomak husi parte Geomexsoft Korea nian.
Geomexsoft Korea mós informa ba Secretário de Estado das Terras e Propriedades, Jaime Xavier Lopes, M.Eng katak durante ne’e Geomexsoft Korea implementa ona projetu Sistema informasaun rai iha nasaun hanesan; Bangladesh, Etopia no seluk tan. Ho nune’e Geomexsoft Korea garantia katak planu Implementa Projecto “Sistema Informasaun Rai Timor-Leste” posivel no bele implementa hodi melhora no fornese informasaun ne’ebé akurada no viavel.

Depois enkontru serbisu ne’e remata Geomexsoft mós hato’o agradese wain ba Secretário de Estado das Terras e Propriedades, Jaime Xavier Lopes, M.Eng no ekipa ne’ebé maka fó ona tempu hodi vizita edifisiu GITT nian.
Iha enkontru refere partisipa ekipa delegasaun SETP mak hanesan, Sr. Eng. Jaime Xavier Lopes, M.Eng, Secretário de Estado das Terras e Propriedades, Sr. Lucas Antonio da Costa, Director Jéral Terras e Propriedades, Sra. Julberta Soares, Directora Nacional Direito Humano e Sidadania, Sr. Marito Silva F. Sarmento, Asésor Tékniku Administrasaun Finansas e Kooperasaun
Ekipa husi Geomexsoft Korea, maka Sra. Hyunju Bann, Global Consulting H.Q. Aleinde Ekipa husi GITT mak hanesan: Sr. Kwanghee Kim, Branch President GITT (Global Information Top Technology) inklui Sr. Taekyu Ahn, Director GITT.