Sekretáriu Estadu Terras no Propriedades (SETP), Sr. Jaime Xavier Lopes M. Eng. Hamutuk ho ekipa delegasaun, foin lalais ne’e hala’o vizita servisu ba iha Repúblika Korea Sul, hodi kria audiénsia direita ho Vise Prezidente KOICA, oinsa mak bele hametin kooperasaun servisu iha area Terras no Propriedades.
Audiénsia ne’ebé hala’o iha loron 17 Fulan Dezembru tinan 2024, iha Kuartél Jerál Koica - 825 Daewangpangyo-ro, Sujeong-gu, Seongnam-si, Gyeonggi-do, Republic of Korea, ho objetivu prinsipál mak atu hametin kooperasaun servisu entre SETP ho KOICA, nune’e oinsá iha futuru bele estabelese MoU entre Koica ho MJ hodi halo espansaun kooperasaun iha area prioriedades sira.
Durante iha sorumtuk ne’e, SETP hato’o uluk agradesementu ba apoiu ne’ebé durante ne’e KOICA fo ba Governu Timor-Leste. Tanba realidade iha tinan 2023-2024 KOICA konsege apoiu Dirijente no Funsionariu Terras no propriedades hodi tuir formasaun kapasitasaun iha Korea liu husi programa “World Korea Fellowship – CIAT Program (Capacity Improvement & Advance for Tomorrow).
Realidade konkretu ida seluk mak, agora dadaun KOICA mos fornese hela péritu na’in ida husi NIPA (National IT Promotion Agency) hodi fó Formasaun ba funsionariu Téniku Terras e propriedades iha programa sistema baze de dadus, web data base no aerial surbei utiliza drone durante tinan ida (1) nia laran.
Ho apoiu hirak ne’e mak Sekretáriu Estadu Terras no Propriedades, Sr. Jaime Xavier Lopes, M.Eng hakarak hala’o vizita servisu mai Republika Korea Sul, hodi bele hato’o agradese obrigadu diretamente ba KOICA.
Nune’e durante iha audiensia refere, SETP mós husu KOICA liu husi Vise Presidente KOICA Asia Europa Sr. Lee Yun Young atu bele apoiu Terras e Propriedades iha parte implementasaun “Projecto Konstrusaun Sistema Informasaun Rai Timor-Leste.”
Tanba, parte SETP haree katak Projecto Konstrusaun Sistema Informasaun Rai Timor-Leste ne’e sei fó benefisiu ba kresementu ekonomia nasaun nian, iha poténsia atu hasa’e maka’as prátika jestaun rai iha Timor-Leste. Tanba ne’e husu atu KOICA mos bele fo apoiu hodi foka ba inisiativa dezenvolvimentu hamutuk, kapasitasaun, sensibilizasaun públiku, integrasaun ho planu nasionál, no esforsu sustentabilidade, parte rua bele kria enkuadramentu robustu ba kolaborasaun efetivu ne’ebé fó benefísiu ba komunidade lokál no apoia kreximentu ekonómiku ne’ebé sustentável.

Iha enkontru ne’e Vise Presidente Koica Sr. Lee Yun Young orgullu simu enkontru importante ida ne’e, tanba liuhosi enkontru ne’e Koica iha prontidaun atu apoiu SETP hodi halo melhoramentu ba “Konstrusaun Sistema Informasaun Rai Timor-Leste”
Ho ida ne’e, KOICA rekomenda ba SETP atu aselera proposta liu husi liña Bilateral ne’ebé maka estabelese ona entre Koica – Governo Timor Leste. Ho nune’e projecto “Konstrusaun Sistema Informasaun Rai Timor-Leste” bele implementa iha tinan 2025.
Iha biban ne’e, Vise Presidente Koica Asia e Europa, Sr. Lee Yun Young mós informa katak durante ne’e Koica apoiu ona $ 127 Milaun ba Governu Timor-Leste no ba futuru kontinua no komitmentu apoiu Governu Timor-Leste iha area oin-oin bazeia ba proposta projecto ne’ebé hato’o husi Ministerio sira iha Timor-Leste.
Purtantu rezultadu hosi enkontru entre parte rua ne’e, konsege hetan rezultadu positivu.
Durante vizita servisu hosi ekipa delegasaun SETP iha Korea do Súl hetan apoiu asistensia másimu husi Embaixador RDTL iha Seoul Korea.
Iha sorumutu ne'e hetan partisipa hosi ekipa delgasaun SETP kompostu hosi, Sekretáriu Estadu Terras e Propriedades, Sr. Jaime Xavier Lopes, M.Eng., Director Geral Terras e Propriedades, Sr. Lucas Antonio da Costa, Diretora Direitu Umanu no Sidadania, Sra. Julberta Soares, Embaixador RDTL ba Korea do Súl, Sr. Antonio de Sá Benevides, Asésor Tékniku Administrasaun Finansas e Kooperasaun, Sr. Marito Silva F. Sarmento, Asistente Adido do Trabalho, Sr. Jose Coli. Enkuantu parte hosi Ekipa KOICA mak hanesan Vise Prezidente KOICA Asuntu Asia e Europa, Sr. Lee Yung Young, no Diretor Jéral Koica - Asuntu Ekipa Sudeste AziátikuSr. Kim Jun Mo, Asistant Manager, Secretária Vise Presidente Koica asuntu Asia e Europa, Mingyeong Kim. (REMATA)