Liquisa, MJ- Tersa-Feira 10 Dezembru 2024 IX Governu Konstitusionál liuhosi Sua-Eselénsia Ministru Justisa, Dr. Sérgio de Jesus Fernandes da Costa Hornai hamutuk ho funsionáriu Ministériu Justisa komemora loron Mudiál Direitus iha Aldeia Delesuat, suku vaviquinia, postu Administrativu Maubara, Munisípiu Liquiça.
Ministru Justisa hateten, iha loron 11 fulan-outubru tinan 1996, Komité Prémiu Nobel fó ónra dala ida de’it ba oan-mane Timór nian na’in-rua, atribui Prémiu Nobel Pás nian ba Don Carlos Filipe Ximenes Belo no José Manuel Ramos-Horta.
“Ha’u hakarak lori governu nia naran, liu-liu Sua-Eselénsia Primeiru Minsitru (PM), ba mandatu IX Governu Konstitusionál nia naran ho orgaun estadu nia naran tomak nu’udár Minsitru Justisa hato’o parabéns ba ita hotu ba konkista hotu ne’ebé mak ita halo ne’ebé ita hanesan estadu parte ba iha Nasoens Unidas,” Governante ne’e agradese liuhosi diskursu.

Timor-Leste ratifika konvensoéns no tratadu barak, iha ajenda Planu Asaun Annual Ministériu Justisa tenke halo hodi bele implemetasaun iha programa direitus Humanos. Liuhosi sosializasaun no mós ezaminasaun ba komunidade hotu-hotu bele hatene direitu no mós dever sira, direitu atu asesu bele hetan servisu, iha direitu atu ba iha ospital, iha direitu atu bele ba edukasaun no mós iha direitu atu halo movimentasaun hosi fatin ida ba fatin seluk.
Iha dever hanesan sidadaun hodi bele kontribui ba iha direitu sira seluk, atu labele ultra-pasa direitu ema seluk ba iha trankuilidade ba iha pás no estabilidade. Fó hakmatek ba ema ida karik, iha uma sorin. Presiza atu bele hare, atu nune’e halo balansu entre ita boot nia direitu no mós ema seluk nia direitu hodi bele moris iha selensiu iha trankuilidade nia laran.
Komisaun Direitu Humanos halo hela servisu lubuk ida iha Ministériu Justisa nia laran. tanba rajaun fundamental hosi ita nia konstitusaun da Repúblika ne’ebe hatuur ba iha artigu 16 koalia igualdade no mós universalidade ba iha direitu humanos ita hanesan estadu parte ita ratifika tiha ona.

“Ita nia konsiensia tenke mosu atu bele oinsa, ita dezenvolve sosializasaun iha ba sosiadade ida ne’e, ho ida ne’e fila-fali ba ita nia komportamentu sivika ema ida-idak ninian. Ita ko’alia kona-ba kontektu direitu humanos ita respeitu ba labarik sira, ita respeitu ba iha idozus , ita respeitu ba ita nia inan-feton sira tanba rajaun fizika,” Ministru Justisa hateten.
Ministru Justisa hakarak lori hanoin ida ne’e, kona-ba respeitu mútua ba iha sosiadade ida ne’e, nu’udár estadu direitu demokrátiku Minsitériu Justisa, Provedor Direitus Humanos, Sosiadade sivil no mós organizasaun hotu-hotu tenke kautela no halo medida sira hotu atu bele fó respeitu ba iha ema nia direitu.
“Tanba direitu ida ne’e, direitu fundamental sidadauk ida-idak ninian atu moris iha estadu ida, familia ida, iha sosiadade ida ho responsabilidade, ita halibur hamutuk iha fatin ida ne’e, atu komemora loron mudiál ba iha direitu humanos ninian. Timor-Leste nia komprimisiu atu bele hametin estadu ida no governasaun ida diak,” Ministru Justisa hateten.
Ministru Justisa esplika, atu relembra fila-fali katak, governu prontu loos atu bele hametin pás no trankuilidade iha sosiadade. Nune’e oan sira bele ba eskola, moris iha ambiente seguru.

Ministru Justisa lori IX Governu Konstitusionál, lori Primeiru Ministru (PM) Kay Rala Xanana Gusmão nia naran hodi transmite mensajen ba povu Timor-Leste katak, “ita iha komitmentu boot, ita iha politika, ita hakarak diresiona ita nia politika ba dezenvolvimentu pás no estabilidade direitus humanos iha ita nia rai ida ne’ebé dura-dura hodi semo dook liu tan.
Entretantu iha komemorasaun Loron Mudiál direitus Humanos ne’e, partisipa masima hosi Veteranu sira, komunidade sira, autoridade lokal sira, no estundante sira hosi suku Vatuboro, Gugleur, Maubaralissa, Vaviquina no seluk tan.