AILEU, MJ- Sabadu 07 Dezembru 2024 Sua-Eselénsia Ministru Justisa, Dr. Sérgio de Jesus Fernandes da Costa Hornai, akompaña Primeiru-Ministru (PM), Kay Rala Xanana Gusmão, husu povu no Joven sira hosi Munisípiu Aileu, atu keta haluha istória kore korente hosi Estátua Dom Aileu Baumeta, iha rotunda Dom Alileu Baumeta, iha suku Liurai, Aileu vila.
Objetivu inagurasaun ne’e, atu entrega fali atributu sira meik no kro’at sira durante iha tempu funu Tinan 1975 nian laran, hodi prevene atu mosu tan lori kro’at hatudu ba malu entre joven sira, nomós jerasaun sira tuir mai.
“Mehi no prinsípiu bá ukun rasik-an mai hosi bei-ala sira. Ne‘e katak, iha kotuk ne‘ebá ita iha istória. Ita iha kultura rasik. Ita iha identidade rasik,” Primeiru Ministru husu bá povu Aileu ho joven sira inklui povu Timor-Leste (TL) atu lebele haluha istória. Iha serimónia inagurasaun ne’e.

Xefe Governu ne’e apela bá timoroan tomak katak, hotu-hotu hamoris fila-fali kultura. Fila-fali bá uma lisan, tuur huu ahi hodi moris nafatin.
Xanana Gusmão agradese tanba hetan ona konvite hodi partisipa iha serimónia ida-ne’e no rona direta istória loloos hosi Dom Boumeta.
Líder nasionál ne’e konvida Aileu-oan sira atu hamutuk hakru’uk bá Dom Baumeta, bá ema hotu-hotu ne’ebé iha tempu Portugés halo revolta hasoru Portugés sira, tanba sira lori kilat musan oitoan maibé revoltozu sira lori de’it mak dimah ho rama.
Istória
Estátua ne'e hari'i iha tempu okupasaun Indonézia iha tinan 1992 hosi ukun-na’in sira iha momentu ne'ebá, estátua ne'e reprezenta Dom Baumeta no hanesan símbolu kadeira Aileu nian.

Surik nu'udár instrumentu tradisionál ne'ebé mane sira uza hodi bidu no mos nu'udár símbolu hodi proteje-an hosi ameasa oioin.
Korente nu'udár instrumentu komún ida hodi futu ema kriminozu ruma. Tau korente signifika, kesi metin fatin istória bá ukun rasik-an, no povu Aileu nia funu na’in sira. Tanba Aileu-oan mak kore-an uluk hosi kolonialista Portugés nia ukun, maibé korente ne'e tau fali iha tempu okupasaun Indonézia nian.
Tuir konseitu hosi inisiadór bá konstrusaun estátua ne'e katak, primeiru kore-an, hakotu koloniálista Português sira nia ukun, segundu salva naran Aileu tanba sira hatene katak, funu sai hosi Aileu, tanba ne'e maka maun alin hakarak troka naran bá Kabupaten Rusa Fuik, no troka naran suku Aisirimou bá desa Pancasila. Nune'e, Indonézia sira konvensa hodi hari'i tiha estátua ida-ne’e reprezenta Dom Baumeta.
Ho Timor-Leste nia Independénsia, Aileu oan sira hakarak hasai tiha korente ne'ebé sei bobar-an hela iha estátua Dom Baumeta nia liman no ain. Signifika, Aileu-oan sira kore-an hosi kolonializmu Portugés no maun alin Indonézia sira nia ukun.

Hafoin serimónia kore korente hosi Estátua Dom Aileu Baumeta, tuir planu iha sábadu (07/12/2024) sei kontinua ho serimónia haloot meik ho kro’at durante funu 1975 no mós inaugurasaun uma lisan Dom Baumeta Aileu iha suku Liurai, postu administrativu Aileu vila.
Iha serimónia ne’e partisipa hosi Minístru Interiór (MI), Francisco da Costa Guterres, Sekretáriu Estadu Arte no Kultura (SEAK), Jorge Soares Cristovão, Deputadu balun, Prezidente Autoridade Munisipiu Aileu, Komandante Jerál PNTL Komisáriu Henrique da Costa, Autoriedade lokál, populasaun no família boot hosi uam lisan Dom Baumeta Aileu.