MANATUTO, MJ- Sesta-feira 06 Dezembru 2024 Sua-Eselénsia Ministru Justisa, Dr. Sérgio de Jesus Fernandes da Costa Hornai hato’o parabéns ba komunidade sira hosi Suku Uma-Rentau, Postu Administrativu Laleia, Munisípiu Manatutu. Tanba durante prosesu levantamentu koopera tebes hodi bele disponibiliza ba grande projetu ne’ebé espetaklu no importante ba rai doben Timor Leste.
Ministru Justisa hato’o lia hirak ne’e liuhosi diskursu, molok asina “kontratu arrendamentu ba fins Investimentu” hamutuk ho kompaña Timor South Sea Fishery Development Lda, Kompaña Guanxi Yanxi Fishery Development. co. Lda. RP, iha Aldeia Lifau, Suku Uma-Rentau, Postu Administrativu Laleia, Munisípiu Manatutu.
“Ha’u hakarak lori Ministériu Justisa no IX Governu Konstitusionál nia naran hato’o parabéns ba komunidade Laleia no komunidade Munisipiu Manatutu. Tanba projetu estratejiku ida ne’e, importante kaer metin hodi bele fó susesu ba iha ita nia projetu ida ne’e,” Ministru Justisa hateten.
Ministru Justisa, Dr. Sérgio de Jesus Fernandes da Costa Hornai hakruk ba Sekretáriu Estadu Terra no Propriedade, Jaime Xavier Lopes, ne’ebé hamutuk ho estrutura Minsitériu Justisa halo esforsu oi-oin bele halibur malu iha fatin ida ne’e, hodi partisipa serimónia referida.
“Tanba komunidade sira durante ne’e, koopera tebes hodi bele disponibiliza arrendamentu ba fins bele halo grande projetu ida ne’ebé espetaklu no importante ba ita nia rai doben Timor Leste. Ha’u hakarak fó parabens ba lia-na’in sira, joven sira no inan-feton sira hotu ne’ebé pertense ba rai ida ne’e , ita bo’ot sira sai tan eroi foun ba dezenvolvimentu rai doben ida ne’e,” Ministru Justisa hato’o agradesimentu.

Nune’e mós lahaluha parabens ba eis titular sira no membru governu sira, veteranu sira, hahú hanoin ida de’it, konsolida hamutuk, oinsa maka hametin koezaun ida ba dezenvolvimentu estratejika iha rai doben Timor leste. tanba projetu ne’e, bele providensia atividade ekonomiku atu bele partilla situasaun sira ne’ebé la’o iha komunidade nia leet.
IX governu konstitusional kompremetidu halo dezenvolvimentu ba Timor-Leste, vertente liu ba estratejiku sira hanesan ne’e. Governu sei atribui terenu imoveis direitu suprefisiu domoniu públiku estadu ka rai estadu ba parseiru estratejiku ne’ebé dekade 10 resin halo negosiasaun.
“Ita halo no kaer monu iha mandatu IX Governu konstitusionál bele konkista no realiza mehi ida ne’e. Ita sei iha traballu kaza ba ita hotu, ba reprezentante prezidente autoridade, nai suku, joventude sira, veteranu sira, unifika forsa ba dezenvolvimentu ne’e,” ministru justisa dehan.

Ministériu Justisa liuhosi Ministru Justisa, Dr. Sérgio de Jesus Fernandes da Costa Hornai, Vise-Ministru Justisa fortalesimentu Institusionál, Dr. Paulo Remédios no Sekretáriu Estadu Terrras no Propriedades, Eng Jaime Xavier Lopes sai Komisaun organizadora ida de’it ne’ebé administra direitu terras no propriedade atu bele haree lalais kooperasaun ne’e. Nune’e labele lakon oportunidade ba iha dezenvolvimentu.
“Providensia rai 64,3 hektares ba iha grande projetu ida ne’e, kompaña ne’e sei halo atividade industria ba peskas. Ha’u hakarak hateten ho grasa maromak bele haraik bensaun ba rai luluk no matebian sira bele la’o hamutuk hodi bele fó susesu ba iha grande projetu ida ne’e,” Governante ne’e hateten.
Ministru Justisa argumenta, nu’udar Ministru Justisa ne’ebé koajuva ba nai Primeiru Ministru Kay Rala Xanana Gusmão lori memrbu governu sira hotu no mós Prezidente autoridade sira hotu hato’o agradesimentu. Tanba bele reunifika forsa sai ida de’it.
Ministru Justisa husu obrigadu ba kompaña Timor South Sea Fishery Development Lda no Kompaña Guanxi Yanxi Fishery Development. co. Lda. RP, atu kompri kontratu arrendamentu ba fins Investimentu.
“Kuandu la kompri kontratu arrendamentu ba fins, sei tama ba iha problema “letícios”. Sei bainhira ita boot sira la halo tuir, ha’u kansela ita boot sira nia kontratu, ha’u hakarak komitmentu la’os serimónia de’it,” Ministru justisa hakotu.

Iha serimónia asintura ne’e, akompaña hosi hosi reprezentante Prezidente Parlamentu Nasionál, Deputada Cedelizia Faria dos Santos, Vise Primeiru Ministru, Eng. Mariano Assanami Sabino, Vise Ministru Administrasaun Estatal, Jacinto Rigoberto, Sekretáriu Estadu Asuntu Toponímia no Organizasaun Urbana, Germano Santa Brites Dias Sekretáriu Estadu Terra no Propriedade, Jaime Xavier Lopes, Sekretáriu Estadu Peskas, Domingos da Conceição dos Santos “Maucaro”.
Nune’e mós, Prezidente Autoridade Munisípiu Manatuto Interna, Domingas Gilpa, Prezidente Autoridade Munisípiu Ermera, José Martinho dos Santos Soares, Prezidente Autoridade Munisípiu Lautem, Melio de Jesus, Prezidente Autoridade Munisipál Baucau, Veneranda E. M. Lemos Martins, Reprezentate Prezidente Autoridade Díli, dirijete sira hosi Ministériu Justisa no funsionáriu sira hotu autoridade lokál sira no antuziasmu hosi povu Laleia.