Dili, MJ- Segunda-feira 18 Novembru 2024 Sua-Eselénsia Ministru Jutisa, Dr. Sérgio de Jesus Fernandes da Costa Hornai, hamutuk ho funsionáriu Ministériu Justisa sira hato’o sentida kondolénsia ba Dirtór Estabelesimentu Prizionál Covalima-Suai, Alberto de Araújo ne’ebé hakotu ninia peregrinasaun iha Hospitál Nasionál Guido Valadares (HNGV), Bidau Lecidere, Díli.
“Horisehik Alberto de Araújo maromak hadomi liu nia, hosi planu ema kriatura ninian. Ha’u lori Ministériu Justisa nian naran, no hosi ha’u ata nu’udar Ministru Justisa ne’ebé hamahan servisu prizaun no mós lori IX Governu Konstitusionál nian naran hato’o ami-nia sentida kondolénsia profunda ba família matebian sira hanesan inan-faluk no oan sira tanba Alberto de Araujo ne’ebé husik ona sira,” Ministru Justisa presta última omenajen ba matebian Alberto de Araújo, iha Rezidénsia Bidau, Díli.

Sua-Eselénsia Ministru Jutisa, Dr. Sérgio de Jesus Fernandes da Costa Hornai, ho laran triste dehan, Alberto de Araújo bele mate ona maibé nia ispíritu sei nafatin ho uma lisan no hola parte iha família boot Ministériu Justisa nian.
“Ita lakon ema di’ak ida, durante kontribui ona ba rai ida-ne’e, ita reza nafatin atu nune’e nia klamar bele hetan moris hias iha leten aas ba.”
Matebian Alberto de Araújo husik hela ninia espoza, Fatima do Santos Lay ho oan na’in-tolu, komposta husi mane ida no feto na’in-rua.
Matebian servisu nu’udar guarda priojionál iha tinan 2003, hanesan funsionáriu, xefe departamentu no ikus liu kargu nu’udar Diretór Estabelesementu Prizionál Suai.

Matebian durante ne’e enfrenta moras diabetes ka raan midar, ho moras ne’e hakotu matebian nia vida ho idade tinan 37, iha tuku 23:00, iha loron-Domingu 17 Novembru 2024, iha Hospital Nasionál Guido Valadares (HNGV).
Molok transporta mate-isin husi Bidau ba Postu Administrativu Maucatar, Munisipiu Covalima. Rajaun Ministru Justisa partisipa debate Orsamentu Jeral Estadu 2025 ba iha faze espesialidade. Nune’e Ministru Justisa sei delega Reprezentante Ministériu Justisa nian hodi partisipa iha prosesu fúnebre ba matebian Alberto de Araújo, iha Semitériu Matai, Postu Administrativu Maucatar-Covalima.