Dili, MJ- Segunda-feira 04 Novembru 2024 Sua-Eselénsia Ministru Justisa, Dr. Sérgio de Jesus Fernandes da Costa Hornai hala’o enkontru dirijente sira hosi servisu terras no propriedades iha edifisiu diresaun nasional servisus kadestrais, Qintal Boot, Díli.
Objetivu hosi reuniaun ne’e, Sua-Eselénsia Ministru Justisa hakarak rona direitamente preokupasaun sira kona-ba servisu kadastro iha Munisipiu Díli ninian. Nune’e bele mellora servisu di’ak liu tan iha tinan 2025.
Iha reuniaun ne’e, Ministru Justisa hamutuk ho dirijente sira hosi servisus terras no propriedades buka solusaun bá komunidade nia preokupasaun durante ne’e. Tanba komunidade sira tau espetativa bo’ot ba servisus terras no propriedades iha Ministériu Justisa.

Ministru Justisa informa, komunidade sira hakarak rejistu sira nia propriedade moveis no imoveis, direitu ba propriedade. Tanba sira hakarak iha dokumentus ida, iha rekoñesimentu ofisiál hosi estadu kona-bá sira nia propriedade, no mós sira nia uma karik sai nu’udár direitu uzu.
Nune’e Ministru Justisa hamutuk ho dirijente sira hosi Ministériu Justisa obsreva no rona aprezentasaun hosi dirijente sira hosi servisu terras no propriedades kona-bá difikuldade ne’ebé maka durante hasoru iha servisus terras no propriedades.