Dili, MJ- Segunda-feira 04 Novembru 2024 Sua-Eselénsia Ministru Justisa, Dr. Sérgio de Jesus Fernandes da Costa Hornai ofisiálmente hato’o diskursu bá serimónia hasa’e Bandeira Repúblika Demokrátika Timor-Leste (RDTL) iha semana dahuluk fulan Novembru tinan 2024, ne’ebé realiza iha edifísiu Polísia Siéntifika Investigasaun Kriminál (PSIK), Cai-coli, Díli.
Ministru Justisa lori IX Governu Konstitusional nia naran hakarak felisita ba dirijente no funsionáriu hotu, fó votu konfiansa ba dirijente no funsionáriu sira hotu atu bele halo servisu labele diskrimina hodi konkista ba estadu RDTL, povu no Ministériu Justisa.
“Ohin ko’alia kona-bá disiplina no oinsa halo empeñamentu ida ho ekselente ba iha fulan Novembru tinan fiskal 2024. Ita bo’ot sira nu’udár ajente funsionáriu públika, nu’udár dirijente iha ita instituisaun públika estadu, halo presaun ida ne’ebé la kotu iha tinan ida ninia laran. Oriente ho vizaun ne’ebé matenek atu bele diresiona planu ne’ebé maka iha Ministériu Justisa bele responde ba prestasaun servisu ne’ebé ho kualidade ” Ministru Justisa hato’o diskusu hafoin sai alta entidade ba iha serimónia hasa’e Bandeira RDTL.
Hahú hosi servisu Diresaun Jerál Polítika Justisa, Diresaun Jerál Administrasaun, Diresaun Gabinete Inspesaun no Auditória, Diresaun Jerál dos Servisus registos e notariado, Diresaun Jerál das terras no proporedades, Diresaun Sentru Formasaun Jurídika no Judisiária, Defensor Públika no Polísia Sientifika Investigasaun Kriminál, Komissaun Direitus Humanos no mós diresaun sira hosi Nasionál to’o iha Munisipiu. Dirijente no funsionáriu hotu servisu hamutuk ho objetivu ida de’it katak “hametin estadu Direitu administrasaun ba Jusitisa ida ne’ebé maka di’ak iha estadu ida ne’e”.

“Ministériu Justisa empeña funsaun ne’e, tanba nu’udar Ministru Justisa husu nafatin ba ita bo’ot sira atu bele konsiente no implementa iha ita bo’ot sira nia vizaun matenek kada loron nu’udár ajente estadu hodi halo prestasaun ida ekselente,” Ministru Justisa husu.
Ministru Justisa dehan, dirijente no funsionáriu hotu iha koñesimentu iha kapasidade no mós iha integridade laiha rajaun ba ita atu koalia kona-bá disiplina ba malu fó hatene ba malu hodi reafirama, restaura fila-fali posisaun nu’udar ajente estadu hodi kontribui ba ita nia rai.

Ministériu Justisa liuhosi kada diresaun no mós servisu autonomia ne’ebé direita ka indireita husu ba malu atu bele hakonu servisu sira lor-loron hodi bele alkansa objetivu tolu ne’ebé iha organika Ministériu Justisa:
Primeiru; asegura ema nia direitu asesu ba justisa iha administrasaun Justisa ninian lalais fó atendimentu ba ita nia sidadaun sira tanba iha duni rajaun. Fó resposta ba ita nia sidadaun sira tanba iha duni rajaun,
Segundu; hametin koejaun iha estadu direitu humanos, respeitu ema nia direitu tanba objetivu prinsipal hari instituisaun estadu de direitu atu bele restaura no garante ema nia direitu humanos liu-liu ba direitu sira ne’ebé sidadaun sira rekere.
Terseiru; fó ema nia direitu tanba iha rajaun lei, faktu, prova no justifika katak nia iha duni direitu ba iha direitu propriedades, direitu ba iha rai, direitu ba iha pasaporte no asistensia sira ne’ebé ita boot sira tenke presta hodi nune’e garantia sidadaun sira nia direitu.