PORTUGAL, MJ-Sabadu 12 Outubru 2024,Sua-Eselénsia Ministru Justisa, Dr. Sérgio de Jesus Fernandes da Costa Hornai, akompaña Sua-Eselénsia Primeiru-Ministru (PM), Kay Rala Xanana Gusmão, simu Prémiu Luzofonia iha Lisboa.
Primeiru-Ministru (PM), Kay Rala Xanana Gusmão hamutuk ho personalidade 14 seluk, simu Prémiu Karreira iha VIII edisaun Prémiu Luzofonia tinan 2024, ne’ebé organiza hosi parseria Komunidade Uza Lian Portugés (CPLP, sigla portugés) no Kámara Munisipál Cascais.

Prémiu Karreira ne’e entrega hosi Sekretáriu Ezekutivu CPLP, Zacarias Albano da Costa ho Mentora Gala Prémiu Losofonia, Isabel Leitão iha salaun Preto e Prata, Casino Estoril, Lisboa.
Primeiru-Ministru Xanana Gusmão espresa sentimentu nakonu ho emosaun tanba bele hola parte iha lista hamutuk ho personalidade sira galardoadas, dezde kriasaun prémiu ne’e iha tinan 2017.
Xefe Governu konsidera prémiu ne’e ninia na’in loloos mak povu Timor Leste, tanba povu Timor-Leste mak luta bá integridade nasaun nian, sakrifika-an bá libertasaun povu ho nia territóriu, ho papél maka lidera luta libertasaun no independénsia ne’e, maibé tuir loloos ne’e povu mak lidera nia.

"Feto, Mane, jerasaun foun no labarik sira iha hau nia nasaun mak inspira ha'u,sira mak fo forsa no esperansa ba ha'u. sira nunka husik ha'u rende iha momentu sira difisil durante ha'u nia viajen, sira mak halo ha'u onradu iha loron ohin" , ” Xanana Gusmão espresa iha serimónia ofisiál ne’e.
Primeiru Ministru lembra katak, buat-ne’ebé akontese iha era independénsia, ne’e ekontese mós iha tinan 22 ikus iha momentu nasaun ne’e dezenvolve-an sai hosi rai rahun.
Nia afirma, se la ho povu Timor ninia reziliénsia no brani, nunka bele sai nasaun ida ne’ebé mak ko’alia Lian Portugés ne’ebé nu’udár orgullu ida, hanesan nasaun demokrátiku, dinámiku no pás iha prosesu viajen bá progresu.
Nia hatutan, se de’it mak la kompriende valór hosi komunidade ne’ebé ko’alia lian Portugés, la kompriende mós sentidu hosi amizade no solidariedade sein dezprovida konveniénsia.

" Universu lian portuges ho Luzofonia iha dimensaun mehi no mehi boot liu hotu-hotu ne'ebe sei la hotu, nu'udar epigrafe iha dala ida ne'e, no hau fiar, " Xanana hateten.
Mehi Lusofonia ida-ne’e, hatuur relasaun kle’an liuhosi halibur ema hotu-hotu iha Lian no kultura, hanesan mós mehi ida bá liberdade ema Timor nian, hamutuk muda mehi ne’e sai realidade.
Valór sira amizade nian no defeza bá injustisa ne’ebé mak mundu tomak kestiona, espesialmente iha nasaun sira mak ko’alia Lian Portugés, ida-ne’e duni mak ajuda tebes TL nia viazen hodi mai to’o iha momentu eventu ida-ne’e.