SINGAPURA, MJ- Kinta-feira 9 Outubru 2024,Sua Eselénsia Ministru Justisa, Dr. Sérgio de Jesus Fernandes da Costa Hornai, delega Diretór Nasionál Asesoria Jurídiku no Lejizlasaun (DNAJL), Dr. Nelinho Vital, partisipa reuniaun Grupu Traballu ASEAN kona-ba Tratadu Extradisaun ba da-11 iha Singappura.
Objetivu hosi reuniaun ne’e atu diskute kona-bá proposta artigu sira ne’ebé sei estabelese Tratadu Extradisaun ba ASEAN nian. Reuniaun hala’o durante loron 3, hahú husi loron 07 to’o loron 10 fulan-Outubru tinan 2024, hamutuk ho nasaun 10 nu'udar membru ASEAN nian.
Timor-Leste nu’udar nasaun observadór ne’ebé partisipa iha reuniaun ne’e hato'o mós pozisaun kona-ba proposta Tratadu ida-ne'e.

Diretór Nelinho iha nia intervensaun katak, Timor-Leste iha ona Lei no.15/2011, 26 Outubru kona-ba Kooperasaun Judisiária Penál Internasionál ne’ebé regula kona-ba extradisaun no akordu legál mútua nian tanba Timor-Leste nia lei, la halai sees husi proposta Tratadu ida-ne’e.
Nune’e mós prosesu adezaun ba ASEAN nian, Timor-Leste agora halo hela prosesu ratifikasaun ba Tratadu ASEAN nian, inklui Mutual Legal Assisstance Treaty.
Hafoin reuniaun Grupu Traballu Extradisaun nian, kontinua kedas ho reuniaun Grupu Traballu ASEAN nian kona-ba armonizasaun lei sira iha área komérsiu nian.