MINISTRU JUSTISA PARTISIPA SESAUN SOLENE, ABERTURA SEGUNDA SESAUN LEGISLATIVA BA VI LEGISLATURA.
Dili, MJ- Segunda-feira 16 Setembru 2024,, Sua Eselénsia Ministru Justisa, Dr. Sérgio de Jesus Fernandes da Costa Hornai partisipa sesaun solene bá abertura segunda sesaun lejizlativa ba VI Lejizlatura, iha sala plenária Parlamentu Nasionál, Díli.
Parlamentu Nasionál liu husi sesaun plenária ordinária, realiza sasaun solene ba abertura Segunda Sesaun Legislativa ba VI Lejislatura, ho prezensa Sua-Eselensia, Prezidente Repúblika Demokrátika Timor-Leste, Dr. José Ramos Horta.
Iha sesaun solene ida ne’e, hahu ho exekusaun Hino nasionál no minutu ida hakmatek hodi fo onra ba Herois sira ne’ebé mate ba rai ida ne’e, dirije husi Prezidente Repúblika, Dr. José Ramos Horta.
Hafoin hino nasional, Prezidente Parlamentu Nasionál halo abertura ba sesaun solene ne’e, no fo tempu ba Bankada Parlamentar sira hodi halo intervensaun, hahu ho Bankada CNRT, PD, FRETILIN, KHUNTO no PLP. Tuir mai, Prezidente Parlamentu Nasionál hato’o diskursu.
Ikus taka ho menzajen ba Povu husi Sua-Eselensia, Prezidente Repúblika, Dr. José Ramos Horta, iha nia diskursu hatete, “nu’udar ita hahú Sesaun Lejislativa ida tan, hau reitera hau-nia kompromisu atu kontinua servisu hamutuk ho Governu, Parlamentu Nasionál no Òrgaun sira Administrasaun Justisa nian, hodi hatán ba ita-nia povo nia hakarak; Futuru Timor-Leste nian depende ba ita-nia kompromisu koletivu atu promove política sira ne’ebé garante dezenvolvimentu inkluzivu, sustentável no ne’ebé reflete valor sira ne’ebé defini ita nuúdar nasaun”.
Antes halo enseramentu ba Sesaun Solene ne’e, Prezidente Parlamentu Nasional, konvida Presidente Repúblika, Primeiru Ministru no Reprezentante Presidente Tribunal Rekursu, hamutuk dere babadok hodi fo inisiu ba Segunda Sesaun Legislativa ba VI Lejislatura, no inagura inisiu uzu sistema digital foun ne’ebé kombina imajen Ho lian.
Sesaun solene ne’e prezide husi Prezidente Parlamentu Nasionál, Maria Fernanda Lay, ho marka prezensa husi Primeiru Ministru, Deputadu sira, membru Governu sira, representante Prezidente Tribunal Rekursu, embaixador sira no-mos konvidadu ba onra sira seluk.
