Dili, MJ- Sabadu 14 Setembru 2024,, Sua-Eselénsia Ministru Justisa, Dr. Sérgio de Jesus Fernandes da Costa Hornai, partisipa lansamentu Memoriál INTERFET iha ámbitu selebrasaun aniversáriu Forsa Internasionál ba Timor-Leste (INTERFET) ba da-25. Ho marsa saudável, hahú husi Portu Dili to’o Palásiu Prezidensiál Nicolau Lobato.
Desfile ka marsa saudável ne’e marka prezensa husi eis membru INTERFET, veteranu, reprezentante Governu no bainaka internasionál sira. Fó bensaun ba Memoriál INTERFET nian, ne'ebé lokaliza iha antigu eliportu forsa manutensaun pás nian, iha Palásiu Prezidensiál nia sorin.
Serimónia ne’e marka inísiu ofisiál ba konstrusaun Memoriál no Muzeu INTERFET nian, ne’ebé sei fó onra ba INTERFET nia papél importante hodi restaura pás no estabilidade iha Timor-Leste.
Ministru Prezidénsia Konsellu Ministru, Hermenegildo Agio Pereira konsidera Memoriál no Muzeu INTERFET ne’e hodi afirma memoriál ida-ne’e sei sai símbolu aten-barani, solidariedade no esperansa nian.
“La'ós de'it atu komemora pasadu, maibé mós atu inspira jerasaun sira iha futuru. Ohin, ho bensaun ida-ne’e, ita hahú konstrusaun espasu ida-ne’ebé sei dedika ba memória ema sira-ne’ebé luta ba pás no justisa iha Timor-Leste,” Agio Pereira hateten.
Ministru Agio Pereira dehan, Timor-Leste la’o dook ona dezde loron uluk sira-ne’ebá. Povu Timor nia reziliénsia no forsa transforma rai ida ne’ebé uluk hasoru adversidade boot sai nasaun prósperu ida.
“Progresu ne’e hanesan omenajen ida ba esforsu koletivu no parseria ne’ebé lori tempu naruk entre Timor-Leste no Komunidade Internasionál,” Ministru Agio Pereira hateten.
Nia afirma katak tinan ruanulu-resin-lima liubá, hodi hatán ba apelu urjente ba pás no estabilidade, INTERFET – forsa internasionál ida-ne’ebé kompostu hosi mane no feto aten-barani sira hosi mundu tomak no hakat ba oin hodi fó apoiu ba povu Timor-Leste.
“Sira-nia misaun la'ós de'it operasaun militár ida, maibé espresaun solidariedade no kompromisu profunda ba direitu umanu no justisa,” Ministru Agio Pereira destaka.

Ministru Prezidénsia Konsellu Ministru konsidera aniversáriu ida-ne’e la’ós de’it momentu ida atu fó onra ba pasadu, maibé mós oportunidade ida atu hafoun fali ita-nia dedikasaun ba jornada la’o daudaun ba pás no harii nasaun no apoiu ba Timor-Leste.
“Mai ita selebra realizasaun sira iha pasadu, enkuantu hateke ba futuru ho esperansa no determinasaun.”
Ministru Agio Pereira espresa dezeju atu fatin ida-ne'e hetan bensan ho naroman esperansa nian no espíritu unidade nian, ne’ebé define misaun ida-ne’e no kompromete serbisu ne'ebé la'o hela atu harii mundu ida ne'ebé justu no pasífiku.
Iha parte lokraik komemorasaun kontinua ho jogu futsál no konsertu iha Palásiu Prezidensiál no iha kampu futsal ne’ebé besik.
Jogu dahuluk, futeból femininu, ne’ebé Ministériu Defeza no F-FDTL maka sei hasoru malu, no jogu daruak mak ekipa Timor-Leste no ekipa Nasaun Unida maka sei hasoru malu. Konsertu sei konta ho atuasaun husi banda Smith Brothers, Ezérsitu Australianu, F-FDTL & Gurkhas, no Dili All Stars.
Iha atividade ne’e, prezide hosi Prezidente Repúblika José Ramos-Horta, Primeiru Ministru (PM), Kay Rala Xanana Gusmão, Xefe Estadu Maiór-Jenerál FALINTIL-Forsa Defeza Timor-Leste (F-FDTL), Tinente Jenerál Falur Rate Laek, Komandante Jerál Polísia Nasionál Timor-Leste (PNTL), Komisáriu Jerál Hendrique da Costa, Parseiru Internasionál sira, Estudante no Funsionáriu Estadu sira.