DILI,MJ-Segunda-feira 09 Setembru 2024,, Sua-Eselénsia Ministru Justisa, Dr. Sérgio de Jesus Fernandes da Costa Hornai, akompaña hosi Prezidente Repúblika, José Ramos-Horta no Primeiru-Ministru, Kay Rala Xanana Gusmão, no Membru Governu sira, bá simu Sua Santidade Papa Francisco, iha Aeroportu Internasionál, Prezidente Nicolau Lobato, Comoro, Dili.
Lider bo’ot igreja katólika romana ne’e, to’o Timor Leste, iha tuku 2:10 Meudia oras Timor-Leste, ho aviaun Air Niugini, hafoin kompleta vizita apostólika iha nasaun Papua Nova Guinea durante loron tolu.
Iha Aeroportu Internasionál Prezidente Nicolau Lobato Komoro, simu ho formatura parada militár hosi FALINTIL-FDTL, tuir kedas ho tara tais labarik ki'ik oan na'in rua bá Sua Santidade Papa Francisco, nu'udar jestu bemvindu mai Timor-Leste.

Xefe Estadu no Xefe Governu hamutuk ho Membru Governu inklui Sua-Eselénsia Ministru Justisa, Dr. Sérgio de Jesus Fernandes da Costa Hornai kontinua kedas akompaña Sua Santidade tama iha sala VIP, no tuir bá sa'e karreta própriu ne'ebé Governu prepara ona hodi tula Sua Santidade husi Aeroportu Komoro bá iha rezidénsia Papa nian iha Nunsiatura Apostólika, Motael.
Komesa husi Aeroportu mai iha rotunda Prezidente Nicolau Lobato, Betó, Fatuhada no tuir dalan ninin to'o iha rezidénsia apostólika iha Motael, sarani sira ho enturizmu tebes hamrik iha loron manas nia laran hodi hein atu simu bensaun husi Sua Santidade Papa Francisco.

Entretantu, tuir oráriu, iha tuku 6 lokraik ne'e, Sua Santidade Papa Francisco sei hala'o enkontru bilateral ho Prezidente Repúblika, José Ramos-Horta no kontinua kedas ho resesaaun diplomátika ne'ebé sei hala'o iha Palásiu Prezidensiál.
Iha loron 10 Fulan Setembru semana ne'e, Sua Santidade Papa Francisco sei prezide missa solene iha tasi tolu, ne'ebé sei partisipa husi sarani rihun bá rihun husi Munisípiu 12 inklui enklave Oe-cusse. Antes missa. Sua Santidade sei hasoru malu ho padres, madres, katekístas no seluk tan iha igreja katedral.
Hafoin ne'e, iha loron 11 Setembru, Papa Francisco sei hala'o enkontru ho Jovens sira iha Sentru Konvensaun Dili, hafoin kontinua vizita bá nasaun Singapura.