Iha loron espesial ba Timor-Leste 28 Novembru 2012, hanesan tinan-tinan sempre iha selebrasaun ho euphoria atu hodi hanoin hikas fali ukun rasik an ida ne’e.

Hanesan mos povu Timor oan sira iha rai laran nomos iha rai liur, loron 28 Novembru, sai loron espesial tebes. Tamba iha loron ida ne’e maka, fó sai ba mundu konaba Timor Leste nia independensia.

Sr. Dionísio, Ministru Justisa ho nia delegasaun nebé partisipa iha Kongresu Ministru Justisa sira nian ba dala VII iha Roma, Italia konaba Pena de Morte, hamutuk ho nasaun lubuk ida (nasaun 22), inklui Komunidade St. Egidio-Roma, selebra mos loron independensia Timor Leste nian.

Hamutuk iha han kalan ikus ho kongresista nomos Komunidade St. Egidio rasik, Sr. Ministru Dionísio hetan honra bot atu hato’o lia fuan ba konvidadus hotu, relasiona ho loron indepedensia Timor nian ne’e.

Iha nia intervensaun badak ne’e, Sr. Ministru dehan katak, maske Timor-Leste sei nurak no mukit nian laran, maibe hanesan nasaun ida soberanu hakarak “ezisti mos” hanesan nasaun seluk ne’ebé moris uluk ona. Nomos hakarak Timor-Leste atu sai exemplu diak ba nasaun seluk, hanesan iha area direitus humanus nomos kestaun pena de morte ne’e.

Hafoin hato’o tiha intervensaun badak, kontinua kedas ho troka prenda entre Sr. Ministru ho Presidente Komunidade St. Egidio nian, inklui fó toast ba Timor-Leste husi nasaun seluk nomos konvidadus sira.

Iha han kalan hamutuk hodi selebra mos loron independensia ne’e, aliende partisipa husi delegasaun Timor-Leste nian tomak, partisipa mos Charge d’ Affairs (Ambassador Interinu Timor-Leste ba Santa Se) Sr. Armindo Simoes ho nia funisonariu sira.