DÍLI, MJ Kinta-feira,14 Marsu 2024, S.E. Ministru Justisa Dr. Sérgio de Jesus Fernandes da Costa Hornai, lidera enkontru ofisíal hamutuk ho Adjunta-Prokuradora Jerál Repúblika, (A-PJR), Dra. Angelina J. Saldanha, Prokuradór Repúblika, Dr. Rogério Viegas, kona-ba komisaun nasionál hodi implementa medida destinada ba kombate krime brankeamentu kapitál no finansiamentu terrorizmu, iha sala reuniaun kafetaria Ministériu Justisa, Rua Justisa Díli.
Objetivu hosi enkontru nee, Adjunta-Prokuradora Jerál Repúblika no Prokuradór Repúblika atu fornese dadus kona-ba APG Group Anti Money Laundering Asia Pacific, neebé sei halo on site visit iha Timor-Leste ligadu ba avaliasaun mutuál ba Timor-Leste tinan 5 nian hosi 2018 too 2023.
S.E. Ministru Justisa informa, primeiru hanesan membru Konsellu Nasionál oinsá maka atu bele hare servisu relativamente ba pessoal sira ne'ebé maka sei mai, hodi hare ba progresu ne'ebé halo durante iha avaliasaun ka kontribuisaun liu-liu ba iha Adjunta-Prokuradora Jerál Repúblika no Prokuradór Repúblika ninian kona-ba progresu servisu ne'ebé halo ba iha vertente sira.
Primeiru kona-ba Mutual Evaluation Report (MER) ne'ebé hakarak ka lakohi, hanesan parte husi estadu, tenke hare ho prudente, kuidadu tebes ba medida hotu ne'ebé halo. Ho nune'e bele hare hakat dook liu tan.
Ministru Justisa informa iha reuniaun nee, ha’u lakohi ko’alia barak kona-ba medida oinsá maka ita atu prevende no halo radikasaun kombate brankeamentu kapitál.
Oinsá maka atu simu investór Internasionál sira tama iha Timor-Leste, oinsá maka sira bele halo atividade sira industria ekonómika no finanseira iha ita nia rai, maibé tenke la’o iha tramita ne'ebé los, liu-liu labele report ka hatuur irregularidade, ka ilisitu kriminal sira ne'ebé atu lori ita ba iha situasaun ida ne'ebé perigu. Aat liu bele too iha buat ida fraudefiskal, Money Laundry, ba aktu Terrorizmu, Droga, depende faze hirak ne'ebé ita nia lei brankeamentu kapitál hatuur tiha ona.

Ministru Justisa hakarak konvoka reuniaun ida ne'e, hamutuk ho MNEK hanesan Co Prezidente, ba iha komisaun ida ne'e ninian, atu reinteira ba situasaun rua iha rai laran liu-liu komisaun prepara ho didi'ak, ho nune'e bele hatan ba preokupasaun ne'ebé maka iha.
Ministru Justisa dehan, saida mak ita bele halo? Ita buka esforsu hotu-hotu atu hasa’e ita nia rangking ka halo estabilidade ba iha ita nia rangking, hodi kontribui ba iha paz, konsolidasaun, Demokrasia no Justisa ninian.

Nuudar parte hosi estadu iha obrigasaun atu hare situasaun hirak ne'e, ita mós iha kooperasun Internasionál sira ne'ebé iha dezemvolve atu husu nafatin tulun asisténsia organizasaun internasionál sira, liuliu multilateral sira, ajénsia ONU nian hanesan United Nations Office on Drug and Crime (UNIDC), para fó nafatin asisténsia ba ita, maibé ita tenke prepara asisténsia saida maka ita atu husu ba ajénsia Internasionál sira.

Sei ita rasik, la konsolida ita nia organizasaun sira ho didi'ak para bele hetan ba iha ita nia situasaun tékniku, lei estruturante hahú husi tinan 2010 depois rezolusaun ida ne'e mosu. Ha’u hakarak fundamenta katak, ita hotu tenke halo servisu ida ne'ebé maka'as, no oinsá buka medida no esforsu hotu-hotu hodi halo prevensaun.
Iha enkontru nee partisipa hosi Diretora ezekutiva Unidade Intelijénsia Finanseira (UIF), Diretór Jerál, Ministériu Negósiu Estranjeiru no Kooperasaun (MNEK), Diretór Polísia Sientifika Investigasaun Kriminál, (PCIC-sigla Portugés), Diretór Diresaun Nasionál Asesoria Jurídika no Lejizlasaun (DNAJL), no akompanha hosi Assessora teknika Gabinete Ministru Justisa, no seluk tan.