DÍLI, MJ — Tersa-Feira (20/02/2024), S.E. Ministru Justisa Dr. Sérgio de Jesus Fernandes da Costa Hornai, realiza enkontru ho ekipa traballu reforma setor Justisa, iha edifísiu Minsitériu Justisa, Bairru Liceu, Díli.
Objetivu hosi reuniaun ne’e, S.E. Ministru Justisa Dr. Sérgio de Jesus Fernandes da Costa Hornai esplika, ko’alia kona-ba oinsa maka Ministériu Justisa hamutuk ho komisaun reforma, atu bele haree programa sira importante ne'ebé atu sujeita ba iha reforma ninian.
Hahú kedas iha vizaun estratejia sira, iha dizeñu polítika setor justisa ninian ne'ebé sempre halo artikulasaun ba iha Polítika Governu nian. Tanba komisaun ne'e mai atu bele hanesan altu nivel atu reforsa hamosu rekomendasaun sira ho ninia estudu sira ne'ebé kle’an, ba situasaun real ne'ebé Timor-Leste hasoru hela iha ninia setor justisa.
Iha ninia instituisaun ne'ebé eziztensia ne'ebé maka la’o hela, ninia lei estruturante sira ne'ebé agora lei vijente sira, karik haree buat balun omissus ka lakunas kona-ba pozisaun ruma. Oinsa mak atu halo harmonizasaun atu lei ida ne'e, bele orienta ba iha dalan loos.
Ministru Justisa akresenta, la’ós ida ne'e de’it maibé atu haree kona-ba mediu no longu prazu, liuliu ba iha polítika formasaun sira ne'ebé ita atu halo, ba iha kuadru setor justisa Timor ninian.

Tantu iha polítika publika Administrasaun setor justisa ninian, nune'e mós iha setor judisiariu liuliu iha tribunál, Ministériu Publiku, Defensoria Públika, Advogadu, offisial Justisa, no orgaun Polisia Kriminál nian.
Ministru Justisa dehan, informasaun sira ne’e nesesáriu, halo kondisaun balun oinsa mak atu bele prepara ema hodi bele kontribui ba iha Centro Formasaun Jurídica, liuliu iha universidade sira atu bele produz, Fakuldade Direitu ida ho ema ne'ebé iha kualifikasaun aas hanesan lisensiatura, iha direitu atu bele kontribui ba iha Centro Formasaun, Centro Formasaun nune’e ba iha futuru produz kuadrus sira excelente, atu ba iha fatin sira hanesan, servisu Notariadu, Tribunais, Defensoria Pública, advogadu, no ba iha offisiál iha instituisaun sira relevante ne'ebé maka konstitui iha setor justisa ninian.
Entretantu, ekipa traballu reforma Justisa kompostu husi Koordenadora Grupo Traballu Reforma Setór Justisa, Dra. Lúcia Lobato, Eis Prezidente Tribunál, Rekursu, Dr. Cláudio Ximenes, Paula Fernando CES-Coimbra, Portugál, Patrick Keuleers husi UNDP, Miguel Lemos - Konsultór UNDP, Sahe Silva Konsultór UNDP no Bruno Lencastre husi UNDP, no akompanha husi Diretor Jeral Politika Justisa, Diretor DNHJL, no Assessora teknika Gabinete Ministru Justisa, Sra. Madalena Carlos Pereira.