Sekretáriu Estadu Terras Propriedades (SETP) Jaime Xavier Lopes iha loron 4 fulan-Outubro 2023, foin lalais ne’e entrega termo servisu ba kargu dirijente no kargu xefia iha ámbitu Diresaun Jeral Terras Propriedades.
Iha serimonia entrega kargu dirijente no kargu xefia nian ne’e SETP liuhosi ninia intervensaun hateten, hanesan servidór Estadu, tenki kumpri lei no regra sira ne’ebé hatúr ona iha Lei funsaun Públika.
Tanba ne’e husu atu ita-boot sira tenki fó atendementu ne’ebé hanesan ba sidadaun sira hotu, liu-liu ba sira ne’ebé presiza tulun, nune’e mós husu atu hala’o servisu ho responsabilidade, tanba servisu no knár ne’ebé dirijente sira assume ne’e nasaun nian, husu ba hirak ne’ebé hetan fiar tenke assume ho responsabilidade, no sira ne’ebé husik knár tenki fó nafatin kontribuisaun servisu ba iha instituisaun.

Lideransa másimu Terras Propriedades nian ne’e husu ba hirak ne’ebé assume knár nudár Dirijente Terras nian iha munisípiu atu bele bato’o iha suku no aldeia sira hodi foti dadus rai komunidade sira nian, nune’e iha futuru, bainhira investór ruma e ema sidadaun ruma presiza rai, atu halo investimentu, ita bele iha ona dadus.
Membru Governu ne’e akresenta mós, tuir planu, iha tinan sira tuir mai, instituisaun Terras Propriedades sei establese mós nia funsionáriu ba iha postu administrativu sira, e husu mós ba iha tékniku sira atu bele halo identifikasaun ba rai no uma transmigrasaun nian.

Iha fatin hanesan Diretór Jeral Terras Propriedades, Lucas Antonio da Costa hateten entrega servisu ne’e hanesan mós entrega responsabilidade ne’ebé boot, tanba ne’e tenke hatudu servisu ne’ebé di’ak tuir lei, no tenki tuir orientasaun orientasaun superior sira nian, no sira ne’ebé termina ona sira nia kargu atu bele kontribui nafatin, no husu atu idaidak tenki ejerse ninia funsaun hanesan lideransa.

Hirak ne’ebé assume knar foun bazeia ba ofisiu nú. 2030/IX-2023/SE-SCFP loron 27 fulan-Setembru iha Terras Propriedades ne’ebé ho nia durasaun fulan tolu mak, Gaspar Soares de Sá Benevides assume knár hanesan Diretór Nasionál Terras Propriedades, Núncio Tomás da Costa Pereira assume knár hanesan Diretór Nasionál Cadastro, no Zenoveva Xavier Correia Assume knár hanesan Diretora Nasional Informasaun Geospacial.
Partisipa iha termo entrega ne’e mak Sekretáriu Estadu Terras Propriedades, Xefe Gabinete SETP, Diretór Jerlál Terras Propriedades, Diretores nasionais, diretores munisipais inklui xefe departamentu no funsionáriu sira iha ámbitu DGTP nian.