Dili tersa loron 29/08/2023: Sua Exceléncia Ministro da Justiça Dr. Amândio de Sá Benevides, ofisialmente entrega Sertifikadu nasionalidade Timorense ba sidadaun foun sira neé maka adquiri nasionalidade liu husi dalan Kazamentu ba Sidadaun estranjeiru, hamutuk ba ema 123 ne’ebé reprezenta husi ema nain 50.
Serimonia distribuisaun sertifikadu ba sidadaun estranjeiru hirak-ne’e bazeia ba Lei N.o 9/2002, loron 5 fulan Novembru (Lei Nasionalidade nian) no Dekretu-Lei N.o 1/2004, loron 4 fulan Fevereiru kona-ba filiasaun, adosaun, kazamentu no naturalizasaun.
Sidadaun estranjeiru hirak-ne’e mai husi nasaun Indonézia, Kuba, Srilanka no Myanmar, ne’ebé komprova ona hosi Ministériu Justisa.
Atu sai sidadaun Timor ema estranjeiru ida tenke prienxe rekizitu ne’ebé prevé iha lei N.o 9/2002, loron 5 fulan Novembru ( Lei Nasionalidade nian ), artigu 11 (Hetan nasionalidade liu husi kazamentu):
1. Ema estranjeiru ne’ebé kaben ho timoroan bele hetan nasionalidade nu’udar timoroan, tenki halo requerimento ho data pedidu nian no kumnori tuir kondisaun hirak tuir mai:
a) Kaben liu tiha tinan lima nia laran;
b) Hela iha rai-laran haleu tinan rua nia laran;
c) Hatene ko’alia lian ofisiál ida.

2. Ema estranjeiru ne’ebé kaben ho timoroan sei hetan nasionalidade nu’udar timoroan, bainhira anula tiha nia nasionalidade uluk nian tanba kazamentu ne’e.

3. Deklarasaun halo nulidade ka anulasaun ba kazamentu la taka dalan ba nasionalidade adkirida hosi kónjuge ne’ebé hatada kontra ho boa-fé.

Serimónia halao iha sala Auditorium Ministériu Justisa no partisipa husi Vise-Ministru ba Fortalesementu Institusionál, Diretór Polísia Sientífika Investigasaun Kriminal (PCIC, sigla portugés), reprezentante hosi embaixada Indonézia no direijentes husi Ministériu Justisa.
Hahú ohin sira sai ona ema Timor-oan ho direitu no dever hanesan, exeptu direitu atu kandidatu-an ba Presidente da Repúblika tanba alínea a artigo 75° KRDTL.
Parábens sai sidadaun ne’ebé diak isin ho klamar ( jiwa dan raga ) hotu.