Sekretáriu Estadu Terras Propriedades (SETP), Jaime Xaver Lopes, iha loron 21 fulan-Agostu to’o loron 24 fulan Agostu 2023 foin lalais ne’e hala’o vizita servisu ba iha Diresaun Terras Propriedades (DTP) Munisípiu Viqueque, Baucau, Lautem no Manatuto hodi bele haree besik liu tan servisu funsionariu sira nian.
Iha vizita servisu ne’ebé hala’o hosi Sekreteariu Estadu Terras Propriedades (SETP) ne’e, husu ba diretór ho nia funsionáriu sira tenki hala’o ho responsabilidade nune’e mós tenki tane-ás intrese ema hotu nian hodi bele hala’o atendimentu ne’ebé di’ak ba sidadaun sira hotu.

Governante ne’e husu ba dirijente no funsionariu iha DTP Munisipiu nian sira atu bele tama servisu ho pontualidade, nune’e mós hanesan funsionáriu tem de sai exemplar ba sidadaun sira hotu, liu-liu ba sidadaun sira iha munisipiu.
Hanesan membru governu Jaime husu ba funsionariu sira atu bele prepara-án, tanba iha futuru munsípiu sira sei implementa program desentralizasaun.

Membru Governu ne’emós husu ba dirijente no funsionariu sira iha munisípiu hodi bele brani foti desizaun, liu-liu ba sidadaun sira ne’ebé mak durante ne’e la kumpri sira nia dever hodi selu renda ba Estadu, banhira fó ona notifikasaun ba sira liu to’o dala tolu mak la kumpre tenki implementa lei hodi halo despezu administrativu.
Nia subliña mós, ba ekipalentu tékniku ba sukat rai nian no ekipamentu eskritóriu nian, husu ba dirijente sira atu bele identifika hodi bele halo pedidu, nune’e bele tau iha orsamentu jeral estadu 2024.

Durante vizita SETP nian ba iha munsípiu hirak hosi parte Leste nian, dirijente sira hato’o mós sira nia prekupasaun kona-bá moru protesaun ba edifisiu Terras nian sira iha Munisipiu, inklui mós ekipamentu eletrónika sira hanesan Komputadór, Printer inklui mós ekipamentu sira ba sukat rai nian hanesan Metro no hand GPS.
Durante sorumutu ho funsionáriu sira iha munisípiu, dirijente DTP munisípiu nian sira husu hato’o mós sira nia prekupasaun kona-bá estatuto funsionáriu kontratadu sira.*