Sekretáriu Estadu Terras Propriedades, Jaime Xavier Lopes iha loron 27 fulan-Jullu 2023 foin lalais ne’e hetan vizita kortezia hosi Embaixadór Korea iha Timor-Leste Shin Mantaek hodi ko’alia kona-bá koperasaun servisu ne’ebé sei implementa iha futuru.
Iha Enkontru ne’ebé hala’o hosi SETP ho Embaixadór Korea iha Timor-Leste ne’e, SETP husu ba Governu Korea hodi bele fó apoiu liu-liu oinsá atu bele dijitaliza sistema administrasaun nian iha Instituisaun Terras Propriedades.

Hanesan Membru Governu, Jaime mós husu ba iha Embaixadór Korea bele fó mós sira nia tulun iha área infrastruturas nian hanesan, harí edifisiu foun ba instituisaun Terras nian.
Iha sorumutuk ne’ebé hetan mós partisipasaun hosi Diretór Jerál Terras Propriedades no akompaña hosi Assessor sira ne’e, nia salienta mós nia parte agradese tebes ba prezensa Embaixadór Korea ho nia Country Director COICA nian iha Timor-Leste, hodi bele haree rasik ho matan saida mak instituisaun Terras Presiza hodi hetan tulun hosi Korea.

Hafoin hato’o agradesementu ba Embaixador Korea no COICA, SETP relata mós Korea nia ajuda sira durante ne’e ba Nasaun Timor-Leste, hodi halo mós introdusaun ba servisu sira Sekretáriu Estadu Terras ninan no servisu diresaun nian ne’ebé mak tutela iha Sekretáriu Estadu Terras Propriedades nian.
Membru Governu ne’ehateten objetivu hosi enkontru ne’e mak oinsá mak Governu Korea liu hosi Embaixada atu bele fornese ninia volutáriu hodi bele fó apoiu iha kapasitasaun ba rekursu liu-liu iha administrasaun finansas inklui mós oinsa atu kria e-government ba servisu sira instituisaun nian.
Nia hateten ho tulun sira ne’ebé mak Governu Korea sei ofrese ba terras propriedades, iha futuru sei lori mudansa signifikativu timor-leste no liu-liu ba iha Instituisaun Terras Propriedades.

Iha fatin hanesan Embaixadór Korea iha Timor-Leste, Shin Mantaek hateten, nia parte apresia ho inisiativa Sekretáriu Estadu nian, tanba hakarak husu apoiu hosi Koreia hodi bele apoiu voluntáriu no oinsá iha futuru bele dijitaliza sistema administrasaun nian sira iha instituisaun Terras Propriedades.
Diplomata ne’e hateten, nia parte liu hosi COICA sei fo kapasitasaun ba iha instituisaun Terras Propriedades, liu-liu fo kapasitasaun iha área rekursu umanu hodi bele lori instituisaun ba oin ho di’ak, nune’e iha tempu badak sei destaka mós voluntáriu hodi bele fó apoiu servisu iha Terras Propriedades *