Sekretáriu Estadu Terras Propriedades Jaime Xavier Lopes, iha loron 20 fulan-Jullu 2023 foin lalais ne’e marka enkontru ho Diretór Jeral inklui mós diretor nasional no xefe Departamentu sira iha ámbitu DGTP nian hodi ko’alia kona-bá planu atividade diresaun nian iha futuru.
Iha enkontru ne’ebé hala’o iha sala reuniaun Diresaun Jeral Terras Propriedades nian ne’e Membru IX Governu ne’e husu ba Dirijente sira atu bele hala’o servisu tuir orientasaun, nune’e mós husu ba funsionáriu sira atu bele tama servisu tuir oras.
Iha fatin hanesan, Membru Governu ne’e husu ba dirijente sira ámbitu SETP nian atu halo preparasaun planu serbisu no planu orsamentu ba 2024 nian.
Iha enkontru ne’ebé hala’o ho Diretór Jéral, Diretór Nasional no Xefe Departemento sira ne’e hodi haree ba planu asaun 2024, enkontru refere atu bele halo preparasaun ne’ebé di’ak no rona mós planu serbisu hosi kada Diresaun kona-ba preprasaun serbisu tuir polítika Governu nian durante loron 120.

Membru Govenu ne’e mós husu Diresaun Jeral atu bele halo planu atividade kada diresaun nune’e mós identifika atividades serbisu ne’ebé atu halo hodi bele submete antes implementasaun orsamentu ratifikativu.
Hafoin simu orientasaun hosi Sekretáriu Estadu, Diretór Jerál Terras Propriedades Lucas Antonio da Costa hateten, nia parte prontu atu prepara planu no hala’o atividade tuir orientasaun.
Iha enkontru ne’ebé lidera hosi Sekretáriu Estadu ne’e, hetan partisipasaun hosi Diretór, Jerál Terras Propriedades, Diretór Nasionál Terras Propriedades, Diretora Nasional, Cadastro, Reprejentante Diretór Nasionál Geospacial inklui Xefe Departamentu no Assessor no funsionáriu tékniku sira.*