Dili, 1/ 3 / 2023, Sua Exselensia Ministru Justisa Interinu Dr. José Edmundo Caétano (Saka Timor) Partisipa Reuniaun Konsellu Ministru, Kuarta-feira ne’e, iha Palasio Governu.

Komunikadu Imprensa
Sorumutuk Konsellu Ministrus nian iha loron 1 fulan-marsu tinan 2023.

Konsellu Ministrus hala’o sorumutuk iha Palásiu Governu, iha Dili no aprova ona projetu Dekretu-Lei, ne’ebé aprezenta husi Ministru Koordenadór Asuntus Ekonómikus, Joaquim Amaral, ba alterasaun dahuluk Dekretu-Lei n. 23/2009, loron 5 fulan-agostu, kona-ba rejime infrasaun administrativa kontra ekonomia no seguransa alimentár nian.

Projetu Dekretu Lei ida-ne’e, sai ona objetu deliberasaun iha sorumutuk Konsellu Ministrus iha loron 8 fulan-fevereiru tinan 2023, maibé, tanba iha alterasaun balu iha faze redasaun finál nian, presiza submete fali projetu Dekretu-Lei ida-ne’e ba deliberasaun foun.

Aprova mós projetu Dekretu-Lei, ne’ebé aprezenta husi Primeiru-Ministru, Taur Matan Ruak, ba alterasaun dahuluk ba Dekretu-Lei n. 6/2018, loron 14 fulan-marsu, ne’ebé fiksa valór subvensaun (subsídiu) ne’ebé Estadu atu fó ba kandidatu sira Prezidénsia Repúblika nian ba kampaña eleitorál.

Alterasaun ida-ne’e ninia objetivu mak atu fó kompensasaun ba kandidatu sira Prezidénsia Repúblika nian bainhira presiza halo votasaun ba dala rua iha ámbitu Eleisaun Prezidensiál ne’e.

Konsellu Ministrus, tuir projetu ne’ebé aprezenta husi Ministru Obras Públikas, Abel Pires da Silva, delibera hodi aprova adenda ba kontratu públiku n. ICB/021/MPWTC-2015 – kona-ba empreitada ba reabilitasaun estrada Manatutu-Baukau (Pakote A01-02), kona-ba Projetu Reabilitasaun Estrada Nasionál n. 1, hodi hanaruk prazu previstu entrega obra nian ba loron 200 konta husi data efetividade kontratu nian, ho aumentu kustu kontratuál ho valór dolar amerikanu millaun 2,8.
Ministru Turizmu, Komérsiu no Indústria, José Lucas do Carmo da Silva, halo aprezentasaun rua kona-ba opsaun polítiku-lejizlativa ne’ebé sai hanesan baze ba inisiativa hodi kria Lei Baze ida ba Atividade Turístika no ne’ebé sai hanesan baze ba inisiativa hodi kria Autoridade Turizmu ida ba Timor-Leste.
Objetivu husi inisiativa ba kriasaun Lei Baze ida ba Atividade Turístika mak atu estabelese sistema turizmu nian ida, kona-ba oferta no prokura, ho definisaun baze ba organizasaun, monitorizasaun, fiskalizasaun, promosaun no fomentasaun atividade turístika nian sira. Lei Baze ida-ne’e sei aplika ba atividade turístika iha setór públiku no privadu, ba turista rai-laran no internasionál sira, ba rezidente sira, prestadór serbisu no fornesedór produtu no serbisu turístiku sira, nune’e mós ba ajente turizmu sira seluk.
Autoridade Turizmu Timor-Leste, kontrola husi membru Governu ne’ebé responsavel ba turizmu, sei sai responsavel ba implementasaun polítika no planu estratéjiku turizmu nian, ho objetivu atu promove, kapasita, koordena, akompaña no dezenvolve setór privadu no públiku, hodi kontribui ba promosaun no fortalesimentu turizmu no ba dezenvolvimentu ekonómiku país nian.

Vise-Ministru Negósius Estranjeirus no Kooperasaun, Julião da Silva, aprezenta ona opsaun polítiku-lejizlativa nian sira ne’ebé sai hanesan baze ba inisiativa hodi kria rejime ida ba kontratasaun pesoál atu apoia atividade sira adezaun Timor-Leste nian ba ASEAN.
Halo aprezentasaun preliminár ida kona-ba kritériu sira ba kontratasaun no responsabilidade sira husi entidade ne’ebé sei kria ba efeitu ida-ne’e, nune’e mós informasaun sira kona-ba prosedimentu kontratasaun no kona-ba prosesu selesaun nian.
Dezenvolve hela rejime kontratasaun pesoál ne’ebé ho objetivu atu garante kontratasaun ba profisionál sira ho kualifikasaun ne’ebé aas, atu nune’e Timor-Leste bele prepara an didi’ak hodi kumpre rekizitu no obrigasaun nesesária sira ba adezaun ba ASEAN.
Ikusliu, Vise-Primeiru-Ministru no Ministru Planu no Ordenamentu, José Maria dos Reis, no grupu serbisu ba regularizasaun pagamentu sira iha ámbitu kontratu sira ba ezekusaun obra no kontratu ba prestasaun serbisu ho sira ne’ebé iha relasaun direta, halo aprezentasaun preliminár ida ba rezultadu sira husi identifikasaun kontratu, ba kauza no kuantia, nune’e mós posibilidade sira ba ninia regularizasaun. REMATA

Arcanjo Viana das Neves
Media Gabinete Vice Ministru Justisa