Baucau-Bucoli, Sekretáriu Estadu Terras Propriedades (SETP) Eldino Rodrigues dos Santos, iha loron 10 fulan-Fevereiru 2023 foin lalais ne’e hala’o Enkontru ho komunidade afetadu ba konstrusaun monumentu Saudozu Vicente Reis ‘Sahe’ ne’ebé tuit planu sei harí iha Suku Bucoli, Postu Administrativu Baucau, Munisípiu Baucau.
Iha Enkontru ne’ebé hala’o iha Sede Suco Bucoli ne’e, SETP husu ba sidadaun sira hodi bele fó sira nia kontribuiasaun ba prosesu dezenvolvimentu.
Membru Governu ne’e hateten, hanesan jerasaun foun sente orgullu no hakarak hato’o agradesimentu ba familia boot Vicente Reis “Sahe” ne’ebé dedika nia án tomak ba prosesu libertasaun da patria to’o oferese nia vida tomak hodi sai hanesan mestre da Guerra ba Nasaun Timor-Leste iha parte seluk presiza agradese mós ba ita nia funu na’in sira ne’ebé sei moris e la merese atu prega lia kro’at ba sira.

Nia hateten, hanesan Estadu la’ós haree de’it ba ema ho rai, maibé Estadu iha tanba povu iha, maibé kona-bá disputa rai hanesan bucoli nian, ne’e kompeténsia Diresaun Jerál Terras Propriedades, Ministériu Justisa nian.
Eldino hateten, kona-bá atu harí Monumentu Saudozu Vicente Reis ‘Sahe’ nian, ne’e ema hotu nia responsabilidade, la’ós Estadu de’it, maibé komunidade sira mós tenki kopera hodi bele fó mós kontribusaun ba iha prosesu dezenvolvimentu, hanesan mai tuir enkontru hanesan dadaun ne’e mós parte hosi kontribuisaun ba dezenvolvimentu, tanba ho hakarak hodi mai rona esplikasaun sira.
Membru governu ne’e mós husu ba afetadu sira hodi bele kopera ho Estadu nune’e bele konstrui monumentu ba Saudozu Vicente Reis ‘Sahe’ nian iha Bucoli, ba afetadu sira estadu sei la hasai leet deit, maibé sei kria mós kondisaun ne’ebé dignu ba sira.

Iha biban ne’e Membru VIII Governu ne’e husu mós ba iha afetadu sira hodi bele kopera di’iak ho Estadu nune’e labele hamosu despezu Administrativu, tanba iha konstituisaun RDTL artigu 54 alineia dahuluk nian hateten Ema hotu-hotu iha direitu ba propriedade privada, no bele fó ba ema seluk wainhira sei moris no mós wainhira mate,
Nune’e iha alineia daruak nian mós hateten, tuir lei nia lalao’k Labele uza propriedade privada hodi estraga fali nia funsaun sosiál, alineia datoluk nian hateten, atu hetan eh hasai ema ida nia propriedade privada hodi halo ba uzu públiku, tenke selu indeminizasaun loloos ba sidadaun, tuir lei haruka no iha aliena dahat nian hateten, Ema sidadaun nasionál de’it maka bele iha direitu ba propriedade privada sidadaun nian.

nune’e mós iha artigu 141 konstituisaun RDTL nian hateten, Lei mak regula propriedade, nia uzu no utilidade rai nian, hanesan fatór produsaun ekonómiku ida. Tanba ne’e hanesan sidadaun bele rekere ninia diretu maibé tenki fó mós ninia kontribuisaun, tanba tuir nia bainhira harí ona Monumentu Saudozu Vicente Reis ‘Sahe’ nian iha Bucoli, iha futuru fatin ne’e sei sai hanesan fatin tuiristiku.
Iha fatin hanesan Komandante PNTL Baucau, Antonio Desá konsidera kazu disputa rai iha bucoli la’ós kazu disputa maibé dezentendimentu entre familia, tanba saudozu Vicente Reis “Sahe” hanesan mestre ba funu libertasaun nasionál nian, tuir lolós hanesan jerasaun foun presiza valoriza la’ós minimiza heroi sira.

Tanba ne’e nia parte husu koperasaun kominidade sira nian hodi bele harí, monumentu Saudozu, Vicente Reis ‘Sahe’ nian iha Bucoli.
Iha biban ne’e Assessor Tékniku Administrasaun Finansas Gabinete Ministru Justisa, Tomás Manuel Correia hateten kazu refere akontese tanba sei falta kordenasaun, tuir informasaun katak, komunidade bucolic la autoriza fatin hodi harí monumentu iha Bucoli, espera ida ne’e labele akontese.
Tomas hateten, uluk iha tempu invazasaun Bucoli hanesan sentru ba guerleru sira, tanba ne’e, tenki valoriza hodi bele tau nia saudozu monumentu iha ne’e. fiar bucoli oan sei hamutuk fó liman ba malu hodi simu dezenvolvimentu iha rai ida ne’e, tanba ne’e tenki fó kontribusaiun hodi bele kolabora ho estadu.

Enkontru ne’e rasik hala’o iha sede suku Bucoli no hetan partisipasaun hosi Sekretáriu Estadu Terras Propriedades, Assessor Prinsipál Ministru Justisa, Autoridade Munisipál hanesan Adjuntu Prezidente Autoridade Munisípiu Baucau, inklui mós Komandate PNTL Munisípiu Baucau, Dirijente sira iha Ambitu Sekretáriu Estadu Terras Propriedades nian no Prezidente Komissaun Consellu Libertasaun Nasional Munisípiu Baucau nian inklui mós familia husi Saudozu Vicente Reis ‘Sahe’. *