Dili,18/1/2023, Sua Exselensia Vise Ministru Justisa Dr. José Edmundo Caétano (Saka Timor) Partisipa iha Enkontru Konsellu Ministru, Kuarta-feira ne’e, iha Palasio Guvernu. Konsellu Ministrus hala’o sorumutuk iha Palásiu Governu, iha Dili, no aprova projetu Dekretu-Lei, ne’ebé aprezenta husi Ministra Saúde, Odete Maria Freitas Belo, ba alterasaun daruak Dekretu-Lei n. 3/2019, loron 5 fulan-marsu nian, ne’ebé aprova orgánika Ministériu Saúde.
Alterasaun ida-ne’e ninia objetivu mak atu ajusta orgánika Ministériu ne’e nian ho alterasaun sira ne’ebé mosu ho kriasaun Institutu Nasionál Saúde Públika nian, hodi armoniza no integra, ho forma hanesan, kompeténsia sira kona-ba planeamentu, monitorizasaun no avaliasaun saúde nian ne’ebé atribui ona ba Gabinete Polítika, Planeamentu no Kooperasaun iha Saúde, nune’e mós kompeténsia sira kona-ba kontrolu kualidade servisu saúde nian sira, ne’ebé integra iha Gabinete Kualidade iha Saúde.

Prevee mós kriasaun Diresaun Nasionál Nutrisaun no Unidade Jestaun Projetu.
Aprova ona projetu Dekretu-Lei, ne’ebé aprezenta husi Primeiru-Ministru, Taur Matan Ruak, ba alterasaun dahuluk ba Dekretu-Lei n. 24/2021, loron 17 fulan-novembru, ne’ebé kria ona Ajénsia Nasionál Planeamentu, Monitorizasaun no Avaliasaun (ANAPMA).
Alterasaun ida-ne’e ninia objetivu mak atu ajusta ANAPMA ba nesesidade ne’ebé relasiona ho ninia jestaun finanseira no ho objetivu atu ninia estrutura interna sai fleksivel liután no hodi korresponde ba nesesidade sira dezenvolvimentu nian hosi prosesu sira planeamentu plurianuál nian ba prazu médiu no badak, no mós ba monitorizasaun no avaliasaun, no permite atu fó apoiu tékniku efetivu ba Primeiru-Ministru, iha ninia kompeténsia ba fortalesimentu institusionál Estadu nian, no koordenasaun asaun nian hosi membru Governu oin-oin, liuliu atu konkretiza objetivu no meta sira ne’ebé prevee ona iha Programa Governu nian.
Konsellu Ministrus delibera hodi autoriza selebrasaun Akordu entre Governu Austrália no Governu Timor-Leste, no fó mós podér ba Ministru Finansas, Rui Augusto Gomes, hodi asina akordu ne’e, relasiona ho kontribuisaun finanseira direta ida hodi apoiu reziliénsia komunitária no rekuperasaun ekonómika iha Timor-Leste durante pandemia globál COVID-19 Faze da-3.

Tuir akordu ida-ne’e, Governu Austrália hakarak realiza kontribuisaun finanseira direta foun ba Timor-Leste, ho valór to’o dolar australianu millaun 20 (besik dolar amerikanu millaun 14), hodi apoiu komunidade no hadi’a ninia infraestrutura sira liuhusi Programa Nasionál. Dezenvolvimentu Suku (PNDS), subsídiu “Bolsa da Mãe-Nova Geração”, no apoiu mobilidade laborál.
Akordu ne’e prevee katak PNDS sei implementa iha suku 452, no prevee katak subsídiu “Bolsa da Mãe-Nova Geração”, sei haluan ba Munisipiu seluk aleinde munisipiu sira ne’ebé daudaun ne’e prevee ona,  no mós katak programa Mobilidade Laborál sei implementa iha Dili.
Konsellu Ministrus analiza ona opsaun polítiku-lejizlativa ne’ebé sai hanesan baze ba kriasaun Sistema unidade medida legál sira, ne’ebé aprezenta husi Ministru Turizmu, Komérsiu no Indústria, José Lucas do Carmo da Silva.
Opsaun polítika-lejizlativa sira ne’ebé aprezenta ho objetivu atu garante katak unidade medida iha Timor-Leste utiliza modu hanesan no koerente iha nasaun hotu-hotu, ne’ebé permite mediasaun sira ba sidadaun no entidade hotu-hotu bele kompriende, iha area oin-oin, hanesan komérsiu, indústria ka ensinu.
Objetivu atu asegura konfiansa no rigór mediasaun sira, fatór ne’ebé sei permite hodi proteje konsumidór no empreza sira, kria ambiente ida ne’ebé favoravel ba dezenvolvimentu no investimentu ekonómiku no lori konfiansa, ba nivel internasionál hodi aumenta esportasaun no hodi halo akordu internasionál iha domíniu komérsiu, enerjia, ensinu ka indústria.
Ministru Edukasaun, Juventude no Desportu, Armindo Maia, aprezenta dilijénsia ne’ebé halo hela iha ámbitu prosesu rekrutamentu profesór voluntáriu sira.
Durante aprezentasaun, fahe ona opsaun sira ne’ebé sei avalia hela husi Ministériu Edukasaun, Juventude no Desportu ba prosesu rekrutamentu profesór voluntáriu sira.
Ikusliu, Ministru Administrasaun Estatál, Miguel Pereira de Carvalho, halo aprezentasaun ida kona-ba preparasaun sira ne’ebé la’o hela ba Eleisaun Parlamentár tinan 2023, ba nivel planu operasionál, atividade pre-eleitorál, dadus eleitór resenseadu no tempu ne’ebé presiza hodi hala’o eleisaun parlamentár. REMATA