Iha loron Sexta-feira, 21 Julho 2012 liu ba, ekipa DNAJL neébé kompostu husi Direitor DNAJL, técnico legislativu, assessora internasional hamutuk ho estaziariu nain 5 husi fakuldade de direitu Universidade Dili (UNDIL) hatoó esplikasaun detailhu kona ba ba Decreto Lei No. 10/2012 konaba Karreira Espesial no Estatuto ba Guarda Prizional sira.

Decreto Lei neé prepara husi técnico lejislativu husi DNAJL-Ministério da Justiça neébé hetan aprovasaun husi Conselho de Ministros iha loron 14 fulan Dezembru 2011 liu ba no hetan promulgasaun husi Presidente da República iha loron 17 fulan Fevereiro 2012.

Aleinde halo esplikasaun konaba artigu sira iha Decreto Lei refére, iha sorumutu neé loke mos tempu atu halo diskusaun neébé klean hodi hatan no esklarese ba duvidas no perguntas neébé hatoó husi Guarda Prizional sira.

Decreto Lei neé mosu atu hatan ba kompleksidade servisu husi Guarda Prizional sira. Guarda Prizional sira hasoru limitasaun, restrisaun oi-oin, responsabilidade ba risku neébé todan liu tan hanesan efeitu husi knár iha âmbitu seguransa no vijilânsia ba dadur sira, hodi mantein ordem no hakmatek iha estabelesimentu prizional sira.

Aleinde iha kompleksidade servisu, Guarda Prizional sira mos halaó servisu ida neébé diferenti ho funsionariu públiku sira, neébé dala barak hasoru risku iha ou durante halaó kńar neé. Tamba ida neé, Governo iha hanoin ida katak, tengki tau rejime kareira espesial ida ba Guarda Prizional sira, hodi nuneé bele dezenvolve diak liu tan kapasidade profisional nomos atu hadiak kualidade servisu neébé hala’o iha estabelesimentu prizional sira.

Hanesan ita hatene katak, Timor-Leste iha establesimentu prizional 3 hanesan Becora, Baucau no Gleno. Tamba sei iha prosesu rekonstruksaun nia laran, establesimentu prizional Baucau agora dadaun hamutuk hela ho establesimentu prizional Becora iha Dili neé.

Durante tempu diskusaun, mosu duvidas no perguntas barak liu kona ba atu implementa artigu 41 kona ba rekualifikasaun profisional no enkuadramentu funsionariu permanente sira. Hatan ba perguntas no duvidas hirak neé, Direitor DNAJL esplika katak artigu ida mosu tamba atu hetan no hatúr lolos Guarda Prizional ida iha nia fatin hanesan Guarda Prizional lólós duni tuir artigo 3 Decreto Lei neé.

Tamba durante neé, ita hare katak, maske iha Guarda Prizional barak, maibe iha Guarda Prizional balun halaó nia funsaun la’os hanesan Guarda Prizional ida. Guarda sira neé, dala barak halaó mos funsaun administrativu lorloron nian.

Direitor neé esplika liu tan katak, tuir Decreto Lei No.10/2012, Guarda Prizional sira sei tama ba karreira espesial neé hahú husi level hanesan Guarda Prizional molok atu hakat liu ba ou atu hetan nomeasaun ba Guarda Prizional Offisial, Guarda Prizional Sub-Chefe no Guarda Prizional Chefe, tuir strutura karreira nian neébé hatúr iha artigu 10. Atu tama ba karreira Guarda Prozional, sei tuir no tengki priense kriterius neébé hatúr nanis ona iha Decreto Lei neé, ezemplu hanesan sei halo teste ba fiziku nomos teste ba saúde.

Ita iha esperansa bot katak, ho rejime espesial ida neé, bele hakbit no haforsa liu tan dezempenhu servisu husi Guarda Prizional sira. Nomos bele valorize diak liu tan servisu ou kńar neébé Guarda Prizional sira. Tamba funsionamentu justisa atu laó ho diak, sei la ses mos husi servisu diak husi Guarda Prozional sira.

Tuir planu, ekipa DNAJL neé sei ba halo mos diseminasaun kona ba Decreto Lei refere ba Guarda Prizional sira iha estabelesimentu prizional Gleno, Ermera, iha tempu besik neé.

Reportajem husi ekipa Dep. Política Legislativa -DNAJL