Iha Segunda-feira, 29 fulan-Novembru, 2011, realiza tiha ona serimónia tranzisaun husi projetu Ita Nia Rai bá iha Ministériu Justisa nia kompetensia. Marka prezensa iha serimónia ne’e, S.E. Sra.Ministra Justisa, Dra.Lúcia Lobato, S.E. Sra.Embaixadora Estados Unidos America nian, Diretór Misaun USAID, Diretór Nasionál Rai,Propriedade nó Servisu Kadastrál, hanesan mós hola fatin iha serimónia refere, funsionáriu sira husi projetu Ita Nia Rai.

Programa ida ne’e hahú husi USAID iha tinan 2008 hó objetivu atu hamosu programa levantamentu kadastrál ida, atu bele haforsa nó proteje direitu bá rai husi povu timorense. Husi servisu nebe lao ona ba oin, nó hetan kooperasaun ho DNTPSC, iha possibilidade halibur ona deklarasaun hamutuk rihun lima nulu (50.000) iha kapital sanulu resin tolu (13) husi distritu sira iha Timor-Lesta laran.

Akordu Kooperasaun konabá programa ida ne’e hó USAID atu hotu ona, hare mós bá levantamento kadastrál nebe tenke kontinua lao ba oin, atu bele halo hotu kedas iha territóriu Timor-Leste laran, maka serimónia tranzisaun ne’e tenke realize, atu Ministériu Justisa, hahu husi loron ne’ekedas simu knar nó responsabilidade hotu atu bele lori bá oin projetu levantamentu kadastrál ida ne’e.

Iha nia diskursu, Ministra Justisa, Dra. Lúcia Lobato, fó louvor bot bá servisu nebé hala’o ona nó fó-sai fila fali tan kompromisu atu lori bá oin projetu refere. Ministra mós hatete katak : “…husi informasaun nebé halibur tiha ona, projetu ida ne’e iha valor bot ba Timor-oan sira, liu husi esforsu nó koñesimentu projetu ne’e nian halo ona buat barak lori proteje direitu bá rai husi povu timorense.” Ministra mós iha biban ne’e nia laran hato’o obrigado bá kolaborasaun husi USAID nó husi Embaixada Estados Unidos Amérika nian bá apoio hotu nebé fó ona lori hamosu nó lori bá oin projetu ida ne’e.

Iha okaziaun ne’e Ministra hato’o mós nia agradesimentu ba USAID tamba bele ajuda osan bá projetu ida ne’e. Buat ne hotu sei sai núdar komponentes ne’ebé bele fó apoiu ba servisu sira mak durante ne’e hala’o ona.

Husi parte Sra.Embaixadora Estados Unidos Amérika nian, Sra.Judith Fergin, koalia liu mós konabá servisu nebé hala’o ona husi projeto refere, importante tebes bá iha área oin-oin husi dezenvolvimentu nasional nó haforsa tan vontade povo Amerikanu atu kontinua koopera hó Ministériu Justisa.

Hafoin diskursu hirak ne’e ramata, Sra. Ministra Justisa hó Sra.Embaixadora Estados Unidos Amerika nian hamutuk asina Memorando Entendimento depois hatutan hó kua fita, hanesan símbolo ida katak projetu ne’e entrega duni ona bá Ministériu Justisa.

Ikus liu, Ministra Justisa hó Embaixadora Amerikana hó convidados seluk hala’o visita bá instalasaun sira husi projeto refere.

Ananias Babo horta
Media Officer