MINISTRA JUSTISA,Lúcia Maria Brandão Freitas Lobato, Segunda-feira, 21 fulan-Novembru, 2011 foin-lalais ne’e, hamutuk ho formadór nain rua husi Portugál lansa Kursu kapasitasaun kona-ba kriminalidade kompleksa iha matéria penál no téknika investigasaun kriminál.

Iha lansamentu ba kursu mak sei hala’o durante semana rua nia laran ne’ebé partisipa husi ema nain-30 ne’e, Ministra Justisa hato’o ninia agradesimentu ba formadór sira husi Portugál, tamba sira bele fo kapasitasaun ne’ebé di’ak ba Timor-oan sira ne’ebé hakarak atu tuir formasaun ne’e.

Ministra hateten katak iha fulan-rua liu-ba nia simu pedido husi Prokuradora Jeral Repúblika Portugueza, ne’ebé husu atu prepara kursu formasaun ba juiz no prokurador sira sobre área nebe mensiona iha leten. Hodi nune labele akuza ema arbiru deit, selae ema nebe la sala bele akuza katak nia sala, no ema nebe sala bele dehan nia la sala.

Haree ba kestaun ne’e Ministra Justisa sei haruka surat ida ba Prokuradora no nia mós ko’alia ona kestaun ne’e ho Prezidenti Tribunál Rekursu, Claudio de Jesus Ximenes, tamba kursu ne’e interesante tebes ba majestradu sira.

Ne’e hanesan formasaun ne’ebé espesifiku tebes ba majestradu sira atu tuir, tamba ne,e ministeriu gasta osan barak ba formasaun ida ne’e.

“Ne’e la’ós ha’u tur-tur hakarak halo de’it, ha’u hakarak agradese ba sira nain rua ne’ebé mai husi Portugál, sira ne’e tuir Ministra hanesan ema ne’ebé seniór tebes iha Potugál, tamba sira iha esperiênsia barak iha área sira ne’ebé oinsa atu akuza krime sira hanesan krime ekonomia ne’ebé iha ligasaun boot ba korupsaun,” tenik Ministra.

Nia hateten, iha futuru majestradu Timor-oan sira ne’ebé tuir formasaun bele hetan oportunidade atu aprende diak liu-tan, nune’e bele hasa’e kapasidade Timor-oan sira nian iha setór justisa hodi bele haforsa sistema justisa iha ita-nia rai.

Hanesan Prokurador Portugál nian ne’ebé sai mós hanesan formadór ba kursu kapasitasaun ne’e, Albano Pinto hateten, nia parte sente kontente tamba bele servisu hamutuk ho órgaun judisiáriu Timór-Leste nian hodi bele fahe informasaun ho Timor-oan sira.

Sai hanesan formadór ba kursu durante semana rua nia laran ne’e, Carlos da Costa hanesan Polisia Judisiáriu Portugál nian no Albano Pinto hanesan Prokuradór iha Portugál.

Ananias Babo Horta
Media Officer