MINISTRA JUSTISA, Lúcia Maria Brandão Freitas Lobato iha Segunda 24 fulan Outobru, 2011 liu ba, hala’o lansamentu Rejistu ba Labarik sira ne’ebé mak foin moris iha Ospitál Referál Baucau.

Iha lansamentu ne’e, simbólikamente Ministra entrega Sertidaun RDTL ba labarik nain 4 ne’ebé mak moris iha loron lansamentu.

Nune’e Ministra mós hala’o vizita ba sala maternidade hodi haree besik liu tan prosesu rejistu ba labarik ne’ebé foin moris iha ospitál refere, nune’e hodi ko’a mós fita lori inaugura sala ne’ebé funsionáriu MJ nian uza hanesan postu ospitalar iha Distritu Baucau.

Remata tiha ko’a fita, Enfermeira sira ne’ebé servisu iha sala maternidade nian husu ba Ministra Justisa atu fó apoiu komputadór unidade ida ba sira hodi halao servisu sira nia. Hatan ba ejijensia enfermeira sira nian ne’e, Ministra rasik promete ba sira katak iha tempu badak sei tau komputadór ida iha ne’ebá.

Lansamentu ne’ebé halaó iha Distritu Baucau ne’e, hala’o simbolikamente deit ba Distritu 2 hanesan Hospitál Referal Maliana no Hospital Referal Oé-cusse.

Antes lansamentu MJ liu husi ninia deskursu hateten : “…rejistu ba kosok-oan sira foin moris imporante tebes ba nasaun Timór-Leste, tanba iha futuru mai bele fasilita sira atu fásil trata sira nia dokumentu sira seluk.”

Ministra informa mós katak programa hanesan, hala’o mós ona iha 2008 iha Ospitál Nasionál Guido Valadares Dili ne’ebé partisipa husi Primeiru Ministru, Kay Rala Xanana Gusmão.

Ministra hateten tan katak, rejistu neé hahuu ona iha 2007, iha tinan kotu halo ona kampaña ba teritoriu tomak hahuu iha Janeiru 2011 too Setembru 2011 rejistu ona labarik nain 63.000. Nuneé ho koperasaun neébé MJ halao ho Ministeiru Saude hodi halo rejistu ba kosok-oan sira iha Ospitál Baucau neé bele fasilita diak liu tan inan-aman sira hodi bele rejistu sira nia oan neébé foin moris.

Iha fatin hanesan Diretora husi Diresaun Nasionál Rejistu Notariadu (DNRN), Maria Fátima de Castro Araújo hateten, DNRN hamutuk ho Ministériu Saúde estabelese postu ospitalar iha distritu tolu mak hanesan Distritu Baucau, Distrito Bobonaro no Distritu Oé-cusse.

Fátima realsa mós tuir artigu 38 husi Konstituisaun RDTL ko’alia kona-ba protesaun formasaun ema ida-idak nia-án no mós tuir Regulamentu UNTAET no.3/2001 ne’ebé fó knár tomak ba Rejistu Sivil hodi hala’o rejistu iha RDTL.

Antes hala’o lansamentu ba daruak nian ne’ebé simbólikamente lansa iha Baucau ne’e iha loron 20 fulan-Outubru 2011, funsionáriu sira husi DNRN komesa ona hala’o distribuisaun sertidaun RDTL ba labarik sira ne’ebé ho idade tinan 0 to tinan 5 iha Distritu Bobonaro.

Nia esklarese mós katak, liu husi fundu sira ne’ebé Ministeiru hetan husi UNICEF mak ohin loron hahuu kria tan postu ospitalar. Tuir planu iha futuru mai, postu ospitalar sei loke hotu iha distritu tomak.

Nune’e reprezentante UNICEF iha Timór-Leste, Rita Potina hateten, Konvensaun Direitu ba Labarik iha ONU mosu atu imidiatamenete halo rejistu ba labarik sira ne’ebé foin moris.

Reprezentante UNICEF ne’e lahaluha hato’o mós ninia agradesimentu ba ministériu relevante tamba bele halo ona rejistu ba labarik sira ho númeru ida nebe áas.

Tuir Rita, UNICEF sei la taka-matan hodi fó apoiu nafatin ba rejistu moris labarik sira nian iha futuru.

-----------------------
Ananias Babo Horta
Media Officer