DÍLI, GMJ – S.E. Ministru Justisa Ivo Valente, simu vizita kortezia ida hosi Sr. Sakai Kohei, Diretór ICD (International Cooperation Department) hosi Ministériu Justisa Japaun nian iha Gabinete Ministru Justisa (GMJ), Díli, loron Kuinta-Feira (18/08/2016).

Vizita kortezia ida ne’e, hanesan jestu amizade no mós atu hametin kooperasaun iha setór justisa ne’ebé estabelese ona entre parte rua iha tinan 2008.

Ministru Ivo lori governu Timor-Leste nian naran hato’o agredese ba Governu Japaun, liu-liu ba Ministériu Justisa Japaun, ne’ebé durante ne’e fó apoiu maximu ba tékniku redatór lejislativa iha Ministériu Justisa Timor-Leste, no mós apoiu hodi halo kapasitasaun liu hosi estudu komparativu no peskiza legál hamutuk.

Hosi sorin seluk, Sr. Diretór Sakai hato’o mós agredesimentu bót ba Sr. Ministru Justisa Timor-Leste, tanba bele hatán ba vizita ida ne’e, no apoiu ba programa kapasitasaun nian. Tanba, Sr. Sakai hanesan Diretór ICD dahuluk nian ne’ebé mak halo vizita mai Timor-Leste.Vizita ne’e hanesan ninian komprimisu rasik atu halo vizita iha Timor-Leste no senti kontenti tebes bainhira hare’e progresu ba programa estudu komparativu ida ne’e. Nia mós esplika liután katak, estudu komparativu iha Ministériu Justisa Timor-Leste, parte Japaun hetan materia lubuk ida atu sai referénsia ba sira. Tanba, Japaun dadaun ne’e, prepara hela projetu ba alterasaun sira-nia Kódigu Sívil iha parte família no kazamentu nian. Ho nune’e, sira mos estuda barak hosi Timor-Leste nian.

Aliénde halo vizita ba Timor-Leste, ekipa Japaun ne’e, halo moós sorumutu ho ajénsia no entidade lubuk ida iha Dili mak hanesan; UN WOMEN, UNDP, JSMP, AlFela, IPTL (Igreja Protestante Timor-Leste), Tribunal Distrital Dili, Defensoria Públika, Centro Formação Jurídiku (CFJ), DNTPSC no DNRN. Liu hosi sorumutu hirak ne’e, sira mós rona no hare’e kona-ba sistema legál iha Timor-Leste, liu-liu ba iha sistema kazamentu no rejistu sívil nian. Área rua ne’e (kazamentu no rejistu sívil) mak sai hanesan alvu objetivu hosi vizita no estudu kompartaivu ida ne’e.

Relasaun ho kooperasaun mútua ne’e, Ministru Ivo Valente fó nia apoiu tomak ba programa ida ne’e. Tanba, Ministériu Justisa liu hosi Diresaun Assessoria Jurídika no Lejislasaun (DNAJL) dadaun ne’e prepara hela projetu alterasaun ba Kódigu Sívil no mós prepara Kódigu Rejistu Sívil. Ho nune’e, parte-rua, Timor-Leste ho Nasaun Japaun, sei fó apoiu ba malu liu hosi kooperasaun ida ne’e, atu bele prepara projetu lei hirak ne’e ba nasaun-rua ne’e.

Atu informa mos katak, programa estudu komparativu, hamutuk entre MJ Timor-Leste no MJ Japaun ne’e, implementa husi DNAJL no ICD, liu hosi progarama semináriu, redasaun lejislativa hamutuk, troka materia lejislasaun nian no mós halo estudu komparativu. Ministeriu Justisa Japaun liu husi ICD mos konvida nafatin ekipa legál hosi MJ Timor-Leste atu bele halo semináriu iha Japaun iha tempu oin mai.

Iha vizita kortezia ne’e, Diretor ICD hetan akompañamentu hosi peskizadór nain rua hanesan; Prof. Onishi no Sra. Minako. Hosi parte Timor-Leste ne’ebé akompaña Ministru Ivo Valente mak; Diretór DNAJL Sr. Nelinho Vital, Xéfi Gabinete Ministru Justisa Sr. Evangelino Belo no Jurista Seniór DNAJL Sr. Honorio Magalhães.

Vizita kortezia ne’e termina ho troka lembransa entre Diretór ICD ho Ministru Justisa Timor-Leste hanesan símbulu ba hametin liután lasu amizade entre Ministériu Justisa Timor-Leste ho Ministériu Justisa Japaun.