DÍLI, MJ – S.E. Ministru Justisa Ivo Valente entrega sertifikadu Kursu Inglés nian ba Funsionáriu Ministériu Justisa ne’ebé mak remata ona nia-kursu durante fulan-hát (hosi fulan-Fevereiru to’o Juñu 2016) iha Lorosa’e English Language Institute (LELI), iha Sala Reuniaun Ministériu Justisa, Díli, Segunda-Feira (01/08/2016).

Hamutuk funsionáriu públiku ema nain 43 mak tuir formasaun Inglésh iha LELI ho nível kursu mak hanesan; beginner 1 hamutuk ema nain 11, elementary ema nain 14, no pre-intermediate (English at Workplace) hamutuk ema 18.

Ministru Ivo Valente bainhira entrega sertifikadu ba formadu sira hateten katak, “kursu ne’e faz parte hosi esforsu Governu nian, atu kontinua hakbiit funsionáriu públiku sira. Aliénde ne’e, formasaun ba funsionáriu sira nu’udar obrigasaun Governu tuir termu Decreto-Lei 38/2012, katak, funsionáriu públiku tenke hetan formasaun minimu oras 40 kada tinan.”

“Ha’u kongratula ita-bót sira, tanba bele fahe ona tempu ho di’ak, entre servisu loron-loron nian no tuir formasaun Inglés ida ne’e. Formasaun sei kontinua nafatin, no Ministériu Justisa sei fó apoiu nafatin ba formasaun iha área lingua nian, inkluindu Inglés, tanba Inglés importante tebes ba komunikasaun internasionál nian, liu-liu Timor-Leste nia preparasaun ba adezaun ASEAN,” esplika Ministru Ivo Valente.

Marka prezensa iha serimónia entrega sertifikadu ne’e mak; Diretór-Jerál Ministériu Justisa, Inspetór-jerál, profesór no tutór kursu inglés nian hosi LELI, Xéfi Gabinete Ministru Justisa, Diretór Nasionál sira no assessora Gabinete Ministru Justisa.