DÍLI, MJ – S.E. Ministru Justisa Ivo Valente nu’udar inspetór ba serimónia Isár Bandeira ne’ebé partisipa hosi direjente ofisiais no funsionáriu Ministériu Justisa tomak iha Estasionamentu Ministériu Justisa, Díli, loron Segunda-Feira (01/08/2016).

Serimónia Isár Bandeira hanesan atividade rutina instituições governu nian iha primeira semana kada fulan. Isár Bandeira mós atividade obrigatóriu ba funsionáriu públiku sira hodi partisipa, aliénde ne’e, hodi hasa’e funsionáriu sira-nia disiplina no espíritu nasionalismu.

Iha ninia diskursu, Ministru Ivo Valente fó-nia apresiasaun bót ba Diretór-Jerál, Diretór Nasionál, Diretór Munisípiu no Xéfi Departementu sira, inkluindu funsionáriu tomak, ne’ebé mak hatudu ona ninia prestasaun servisu ne’ebé di’ak tebes, tuir avaliasaun ne’ebé hala’o hosi Sekretária Estadu Fortalesimentu Institusionál (SEFI) iha diagnóstika nasionál ba Ministériu Justisa. Rezultadu avaliasaun hatudu katak, Ministériu Justisa hetan klasifikasaun-primeiru, kompara ho ministériu no instituisaun Governu sira seluk.

“Ha’u orgullu no apresia ho ita-bót sira-nia servisu, tanba Ministériu Justisa tuir diagnóstika nasionál hanesan ministériu ne’ebé ho kualifikasaun di’ak tebes, primeiru-lugar kompara ho ministériu seluk, maske nune’e, tenke melhora nafatin ita-bót sira nia disiplina, hadia án no avaliasaun tenke la’o nafatin, avaliasaun loron-loron, to’o tinan remata,” hateten Ministru Ivo Valente.

Ministru Ivo hatután, rezultadu avaliasaun naha hela responsabilidade mai ita idak-idak, atu sai ejemplu ba ministériu sira seluk no sai lisaun ba funsionáriu públiku sira seluk hodi banati tuir.

Iha sorin seluk, Ministru Ivo Valente ko’alia mós implementasaun polítika VI Governu Konstitusionál kona-ba pre-dekonsentrasaun administrativa, ne’ebé mak em-faze delega dadaun kompetensia no jestaun balun ba iha munisípiu sira.

Relasaun ho pre-dekonsentrasaun administrativu ne’e, Ministru Ivo dehan katak, “fulan balun tán, Ministériu Justisa liu hosi Terras Propriedade no Rejistu Notariadu sei delega nia programa prinsipál balun ba iha munisípiu sira, hodi responde polítika Governu ba dekonsentrasaun administrativa. Tanba-ne’e, ha’u husu atu Diretór Nasionál no Xéfi Departementu sira hodi ajuda ita-nia funsionáriu sira iha munisípiu, tanba, sira sei iha limitasaun ba rekursu umanus no falta lojístika.”

Ministru Ivo mós aliña kestaun balun relasaun ho disiplina funsionáriu Ministériu Justisa nian; oinsá mak melhora dezempeñu servisu, tenke badinas – servisu maka’as no enkoraja atu kontinua hatudu prestasaun servisu, no seluk-seluk tán.

Isár Bandeira ne’e partisipa hosi direjente ofisiais sira, funsionáriu hodi Diresaun Nasionál Administrasaun no Finansas (DNAF), Gabinete Diretór-Jerál, Gabinete Inspesaun no Auditória, Diresaun Nasionál Rejistu Notariadu (DNRN), Diresaun Nasionál Terras no Propriedade (DNTP-SC), Diresaun Nasionál Servisu Prizionál no Reinsersaun Sosiál (DNSPRS), Diresaun Nasionál Direitus Umanus no Sidadania (DNDHC), Diresaun Nasionál Assessoria Jurídika no Lejislasaun (DNAJL), Defensoria Públiku-Jerál no Polísia Sientífika Investigasaun Kriminál (PSIK).