DÍLI,MJ – S.E. Ministru Justisa Ivo Valente simu vizita kortezia Digníssima Prokuradora-Jerál Repúblika Moçambique Dra. Beatriz Buchili iha Sala Reuniaun Ministériu Justisa, Díli, loron Kinta-Feira (28/07/2016).

Vizita kortezia Prokuradora-Jerál Moçambique Dra. Beatriz Buchili ne’ebé akompaña hosi Prokuradora-Adjunta Timor-Leste nian Dra. Zélia Trindade hasoru malu Ministru Ivo Valente hodi afirma hikas kooperasaun bilaterál entre páiz-rua (Moçambique no Timor-Leste) iha fulan-Juñu 2015 liubá.

Ministru Ivo Valente manifesta nia boas-vindas no agradesimentu ba Prokuradora Beatriz ne’ebé mai halo vizita iha Ministériu Justisa.

“Hanesan paíz amigu, ami, Timor-Leste hakarak agradese ba Governu Moçambique ne’ebé mak durante ne’e fó ona nia apoiu ba dezenvolvimentu setór justisa iha Timor-Leste,” hateten Ministru Ivo Valente.

Ministru Ivo hateten liután katak,“apoiu hirak ne’e fó ona progressu pozitivu hodi hakbiit ami-nia juíz no prokuradór sira hodi prienxe sidadaun sira buka justisa.”

Prokuradora-Jerál Moçambique Dra. Beatriz Buchili mós fó-nia apresiasaun bót ba dezenvolvimentu setór justisa iha Timor-Leste, liu-liu iha área dezenvolvimentu lejizlasaun nian. Prokuradora Mocambique ne’e, promete atu sira-nia lejizladór sira hodi halo estudu komparativu iha Timor-Leste, sira sei mai iha Timor-Leste hodi aprende kona-ba leis kooperasaun judisiál internasionál nian, inklui lei sira ho karáter transnasionál; brankeamentu kapitál, droga no krimi organizadu sira seluk tán.

Vizita kortezia iha ámbitu amizável tebes, líder instituisaun justisa paíz-rua ne’e ko’alia posibilidade kooperasaun ho Sentru Formasaun Jurídika Timor-Leste tuir termu Protókolu Kooperasaun Bilaterál ne’ebé halo ona iha fulan-Juñu 2015 liubá.

Iha biban ida ne’e, Ministru Ivo Valente informa kona-ba alterasaun Estatutu Sentru Formasaun Jurídika (CFJ) nian, limitasaun formadór iha CFJ nune’e prejudika prosesu dezenvolvimentu rekursu umanus majistradu judisiál nian. Relasaun ho kestaun ne’e, Prokuradora Beatriz promete sei haruka prokuradór formadór hosi Moçambique hodi mai iha Timor-Leste atu fó apoiu ba formasaun iha Sentru Formasaun Jurídika.

“Governu Moçambique nia odomatan sempre nakloke ba Timor-Leste, posível, ami sei apoiu nafatin no sei haruka ami-nia prokuradór formadór sira mai iha Timor-Leste,” dehan Prokuradora-Jerál Repúblika Moçambique Dra. Beatriz Buchili.

Iha sorin seluk, líder nain-rua ne’e mós ko’alia kona-ba apoiu ba Defensoria Públiku-Jerál, no posibilidade formasaun Timoroan iha área Rejistu Notariadu, no seluk-seluk tán.

Akompaña Ministru Ivo Valente iha enkontru kontezia ne’e mak; Defensór Públiku-Jerál Sergio de Jesus Hornai, Diretór-Jerál Ministériu Justisa Henrique de Oliveira Ximenes, Xéfi Gabinete Ministru Justisa Evangelino Belo, Diretóra CFJ Marcelina Tilman, Diretór Nasionál DNAJL Nelinho Vital, no Assessora Gabinete Ministru Justisa Estela Amaral.