DÍLI, MNEK –S.E Ministru Justisa Ivo Valente ho kualidade hanesan Prezidente Konferénsia Ministru Justisa Paíz Lingua Ofisiál Portuguesa partisipa iha abertura Semináriu Internasionál ho téma “Tribunais no Estado de Direito”, ne’ebé mak organiza hosi Associação dos Magistrados Judiciais de Timor-Leste (AMJTL) parseria ho Tribunál Rekursu, Konferénsia Ministru Justisa Paíz Lingua Ofisiál Portuguesa (CMJPLOP), no União Internacional de Juízes de Lingua Portuguesa (UIJLP) iha Salaun Nobre Ministériu Negósiu Estranjeiru no Kooperasaun (MNEK), loron Kuarta-Feira (27/07/2016).

Semináriu Internasionál ida ne’e involve juíz no prokuradór paíz sira lingua portuguesa ne’e atu diskute meius apoiu sira ba Projecto de Apoio à Concolidação do Estado de Direito nos PALOP no Timor-Leste. Aliénde ne’e, atu aprofunda questões independénsia judisiál, konsolida sistema justisa ne’ebé efikáz iha Estadu direitu no hare’e ninia implikasaun sosiál, ekonómika no jurídika iha administrasaun justisa no tribunál sira.

Iha abertura semináriu internasionál ida ne’e, Ministru Justisa Timor-Leste Ivo Valente ho kualidade hanesan Prezidente CMJPLOP fó nia ponto de vista kona-ba dezenvolvimentu setór justisa, no Projecto de Apoio à Concolidação do Estado de Dereito nos PALOP no Timor-Leste ne’ebé nu’udar espasu atu melhora kapasidade paíz sira iha sentidu atu prevene no luta hasoru korrupsaun, brankeamentu kapitál, tráfiku estupefasientes, no krimi organizadu no komplexu sira seluk.

Ministru Ivo Valente, ko’alia mós kona-ba ordenamentu judisiáriu Timor-Leste, Konsellu Superiór Majistratura Ministériu Públiku, ne’ebé mak estabelese ona estatutu própiu ba profesionais sira, nu’udar kritériu espesífiku ba promusaun, hare’e tuir nafatin sira-nia kompeténsia, integridade, esperiénsia no méritu hodi garante sira-nia independénsia.

Relasaun ho asuntu ne’e, Ministru Ivo esplika katak, foin dadaun promulga ona Diploma Legál hodi reforma organizasaun no funsionamentu Centro de Formação Jurídica e Judiciária, nia objetivu mak atu reforsa profisionais setór justisa, hanesan pilar importante hodi konsolida independénsia sistema judisiáriu, hodi estabiliza mós instituisaun setór justisa iha rai laran.

Aliénde ne’e, Ministru Ivo Valente esplika mós esforsu Governu Timor-Leste em relasaun ho dezenvolvimentu investigasaun kriminál, komunikasaun judisiáriu ne’ebé komplexu, funsionamentu tribunal, no seluk-seluk tán.

Iha serimónia abertura ida ne’e, S.E. Primeiru-Ministru RDTL Dr. Rui Maria de Araújo partilha mós nia-apoiu ba inisiativa AMJTL hodi organiza semináriu internasionál hodi halibur vários paíz CPLP iha ámbitu PALOP no Timor-Leste, no afirma Governu Timor-Leste nia-apoiu ba dezenvolvimentu setór justisa iha Paíz Lingua Ofisiál Portuguesa idak-idak.

Marka prezensa iha Semináriu Internasionál ida ne’e mak; juíz no prokuradór paíz sira lingua portuguesa hosi Angola, Brazil, Cabo Verde, Guiné-Bissau, Moçambique, Portugál, São Tomé e Príncipe no Timor-Leste, Rejiaun Administrativu Espesiál Macau; Eis-Titulár sira, membru Governu, deputadu sira, advogadu privada, defensór públiku, sosiedade sívil, akadémiku no universitáriu sira, no mós mídia nasionál no internasionál.