PARSEIRU HUSI SERTÓR JUSTISA, Segunda-feira, 25 fulan-Jullu, 2011 liu-ba, hala’o sorumutu ho órgaun judisiáriu sira hodi deskute konabá servisu ne’ebé hala’o ona durante tinan 10 nia laran.

Iha hasoru-malu ne’e, Vise Ministu Justisa, Ivo Jorge Valente, liu husi ninia intervensaun hato’o nia agradesimentu ba embaixadór sira no parseiru husi UNDP, doadores no ema tomak ne’ebé partisipa iha hasoru-malu ne’e.

“Ohin oportunidade di’ak tebes ba ita hotu ne’ebé mak iha kompromisu no sira nia esforsu tomak hodi fó apoiu ba setór justisa Timór-Leste nian hodi haree ho matan saída mak atinje ona no saída mak sai hanesan obstáklu iha Timór-Leste, liu-liu iha dezenvolvimentu setór justisa nian durante tinan 10 nia laran”, dehan Ivo.

Iha sorumutu ne’ebé hetan partisipasaun másimu husi parseiru internasinál sira ne’e, Vise Ministru Justisa hateten : “Parseiru iha setór justisa nian, bele haree ho matan oinsa kondisaun julgamentu iha Tribunál, hanesan mós kondisaun Prokuradoria Jeral da Repúblika no kondisaun Defensoria Públika nian………”
“Nudár Governu liu husi Ministériu Justisa, ami iha difikuldade barak liu-liu iha setór justisa ne’ebé dezenvolve-an tuir etapa sira. Setór justisa iha mós nia planu ida ne’ebé integradu ho planu estratéjiku setór justisa nian” dehan Ivo.

Iha biban ne’e Juis Natérsia Gusmão iha nia intervensaun hateten, juís no prokuradór sira ne’ebé iha distritu susar tebes bainhira julga kazu ruma, arguido sira la besik iha fatin.

Nia mós husu ba parseiru sira atu haree mós kona-bá seguransa. Nune’e, fatin ne’ebé juís no prokuradór sira hela bele seguru, tamba durante ne’e tuir Natércia, uma ba juís sira iha ona, maibe la seguru ba sira tamba falta de seguransa.
Iha okaziaun ne’e, ko’alia mós konabá intervensaun polisia nian, bainhira mosu kazu ruma ne’ebé tenki iha julgamentu hodi foti desizaun ba arguidu sira.

Dalaruma liu husi fase rua, hanesan iha kazu balu tenki entrega ba polisia hodi halo investigasaun, maibé sira tenki haruka fila-fali ba tribunal bainhira liu ona fulan rua Iha fatin hanesan, juís no prokuradór distrital sira kestiona mós konabá falta de tradusaun bainhira iha julgamentu ba kazu iha tribunál distrital. Prova hatudu katak to’o oras ne’e iha Distritu Suai seidauk iha tradutór ne’ebé di’ak.

Ananias Babo Horta
Media Officer