DÍLI, PN – S.E. Ministru Justisa Ivo Valente tuir diskusaun espesialidade ba Proposta Pakóte Lei Rai (Rejime Espesiál kona-ba definisaun Titularidade Bens Imôveis) iha Sala Konferénsia Parlamentu Nasionál, Díli, loron Segunda-Feira (11/07/2016).

Diskusaun espesialidade ba Proposta Pakóte Lei Rai ne’e prezide hosi Prezidente Komisaun A, Comissão assuntos Constitucionais, Justiça, Administração Pública, Poder Local e Anti-Corrupção Dra. Carmelita Caetano Moniz no marka prezensa mós hosi membru komisaun sira.

Prezidente meza, loke diskusaun espesialidade no husu ba Governu, Ministru Ivo Valente hodi esplika konteúdu hosi Proposta Lei artigu 10 kona-ba konseitu hosi posse ba rai iha Rejime Espesiál Titularidade Bens Imôveis.

Iha oportunidade ida ne’e, Ministru Ivo Valente esplika artigu 10 ne’ebé foka ba iha konseitu efeitu hosi posse rai nian, ne’ebé ema ruma uza ba iha habitasaun, kultivu – tós, negósiu no konstrusaun; katak nu’udar forma ezersísiu hodi nain ba rai.

“Artigu lei ne’e iha relasaun barak ho konseitu oinsá fó protesaun ba sidadaun sira ne’ebé mak halo ona tós, konstrusaun no kuda aihoris ruma no kleur hela iha rai ruma ka liu hosi ema seluk ne’ebé fó hanesan arendatóriu,” esplika Ministru Justisa.

Hafoin esplikasaun Governu, Prezidente Meza loke ba intervensaun hosi deputados sira. Diskusaun ho esplikasaun barak liu ho aproximasaun situasaun disputa rai nian ne’ebé sidadaun Timor-Leste infrenta dadaun. Kestaun disputa rai tanba laiha posse iha tempo Portugés no Indonézia kedan, maibé ema hela kleur ona.

Iha sesaun votasaun ba artigu 10 ne’e, aprova ho vótu afavór hamutuk 8, abstensaun 1 no kontra zero (0).

Diskusaun kontinua ba artigu 11 kona-ba posse em kazu domíniu ansestrál, artigu ne’e la-aprova no rekomenda atu lori ba iha plenária Parlamentu Nasionál, proponente mak Deputado Aniceto Guterres.

Depois de remata diskusaun, Ministru Ivo Valente informa katak, “diskusaun espesialidade lei rai ohin remata ona artigu 11 hosi artigu de lei kuaze hamutuk artigu 85. Tanba-ne’e, sei iha sesaun lubun ida tán hodi diskute ho deputadu sira, sei iha diskusaun kada artigu idak-idak hafoin lori ba iha aprovasaun.”

Akompaña Ministru Ivo Valente iha diskusaun lei rai ne’e mak; S.E. Sekretáriu Estadu Terras no Propriedades (SETP) Jaime Xavier Lopes, Diretór Nasionál DNTP-SC Romão Guterres, Diretór DNHJL Nelinho Vital, Diretór DNDHC Flaviano Moniz Leão, Xéfi Departementu sira hosi DNTP-SC no DNAJL, no mós Assessores Jurídica Ministériu Justisa.