DÍLI, KM – S.E. Ministru Justisa Ivo Valente informa katak, ohin relatóriu atividade Komisaun Nasionál Kombate Brankeamentu Kapitál (CNCBC), National Risk Assessment, Planu Asaun CNCBC ba tinan 2016-2020 no alterasaun Lei Rezolusaun Governu nº 10/2014 ne’ebé mak aprezenta hosi Ministériu Justisa hetan ona aprovasaun Konsellu Ministru (KM), iha Pálasiu Governu, Díli, loron Tersa-Feira (14/06/2016).

“Planu Asaun Komisaun Nasionál Kombate Brankeamentu Kapitál (CNCBC) importante tebes ba iha Timor-Leste, no ohin Konsellu Ministru aprova tiha ona, ho nune’e sei hádalan Governu liu hosi liña ministériu sira hodi adopta iha sira-nia planu asaun idak-idak nian para halo prevensaun no kombate krimi brankeamentu kapitál iha Timor-Leste,” hateten Ministru Ivo Valente.

Komisaun Nasionál Kombate Brankeamentu Kapitál – CNCBC lidera hosi Co-Chair Ministru Justisa no Ministru Negósiu Estranjeiru no kooperasaun ho Sekretáriadu Apoiu hosi Unidade Informasaun Finanseiru Banco Central no Diresaun Nasionál Assessoria Jurídiku no Lejislasaun Ministériu Justisa.

Hafoin Konsellu Ministru aprova, Co-Chair CNCBC Ministru Ivo Valente no Ministru Negósiu Estranjeiru Hernani Coelho entrega dokumentus hirak ne’e ba iha S.E. Primeiru-Ministru Dr. Rui Maria de Araújo.

Akompaña Ministru Ivo Valente iha reuniaun Konsellu Ministru ba ajenda barankeamentu kapitál mak; Ministru Negósiu Estranjeiru no kooperasaun Hernani Coelho, Vise-Governadora Banco Central, Diretora Ezekutivu Unidade Informasaun Finanseiru Banco Central Maria Sarmento, Diretór DNAJL Nelinho Vital no Assessor Jurídiku Ministériu Justisa.