JAKARTA, INDONÉZIA – S.E. Ministru Justisa Ivo Valente hasoru malu ho nia homólogo S.E. Ministru Justisa no Direitus Umanus Repúblika Indonézia (RI) Yasonna H. Laoly ba posibilidade kooperasaun bilaterál entre Timor-Leste no Indonézia iha área dezenvolvimentu justisa iha Jakarta, Indonézia, loron Kinta-Feira (09/06/2016).

Iha reuniaun homólogo ne’e, ministru rua ko’alia kona-ba dezenvolvimentu iha área rekursu umanus legal drafting nian, prosesu no apoiu Indonézia ba adezaun Timor-Leste iha ASEAN liu-liu oinsá papel Ministériu Justisa nian, ko’alia mós meius sira atu hádalan interkámbiu servisu prizionais no asuntu rai no propriedade, no ko’alia kooperasaun oinsá mak hasoru krimi transnasionál sira iha fronteira entre nasaun rua ne’e.

Oportunidade ne’e, Ministru Ivo Valente hato’o mós nia-agradesimentu no gratidaun ba Sr. Ministru RI Yasonna Laoly ba reuniaun homólogo ne’ebé foin primeira vez akontese entre instituisaun justisa nasaun rua depois-de Timor-Leste restaura nia ukun án iha 20 Maiu 2002.

“Importante atu dezenvolve kooperasaun ho Ministériu Justisa Indonézia nian, aliénde geografikamente Timor-Leste ho Indonézia besik malu no háfahe de’it ho fronteira terrestre, fronteira mós iha potensia ba kazu krimi transnasionál sira, inklui paíz rua ne’e bele aprende ba malun boa prátika dezenvolvimentu iha setór justisa. Importánsia hosi kooperasaun ne’e sei asegura mós estabilidade siguransa iha fronteira, tanba povu paíz rua iha relasaun kulturál, sosiál no mós ekonomia ba malun,” dehan Ministru Ivo Valente.

Sorin seluk, Ministru Justisa no Direitus Umanus RI simu reuniaun homólogo ne’e ho orgullu tebes, nia saudou ho planu kooperasaun entre Ministériu Justisa rua (RI no RDTL) iha futuru, kooperasaun ne’e sei sai meius atu partilha informasaun kona-ba situasaun prizionais, no sei apoiu malu iha área dezenvolvimentu leis nian.

Ministru Justisa Indonézia hosi Partidu PDI-P ne’e, afirma mós Indonézia nia pozisaun katak, laiha objesaun ba Indonézia atu la-simu Timor-Leste iha ASEAN, sei loke liman ba Timor-Leste hodi sai membru ba ASEAN.

“Reuniaun ne’e produktivu tebes, ha’u hakarak afirma katak, Governu Indonézia fó apoiu ba adezaun Timor-Leste iha ASEAN, laiha objesaun atu la-simu” afirma Ministru RI Yasonna Laoly.

Hafoin ministru nain-rua diskute ámbitu kooperasaun nian, hákotu ho desizaun hamutuk ho hari’i lalais Ekipa Tékniku ne’ebé kompostu hosi Ministériu Justisa Timor-Leste no Indonézia, ekipa ne’e sei diskute no formula área kooperasaun entre paíz-rua ne’e nian no sei lori ba iha Memórando de Intendimento (MoU) iha tempu besik mai.

Reuniaun kuaze oras-ida iha Edifísiu Kementerian Hukum dan HAM RI, Rasuna Said, Kuningan, Jakarta ne’e hákotu ho troka lembransa no foto hamutuk.

Akompaña Ministru Ivo Valente iha reuniaun ne’e; Diretór-Jerál Ministériu Justisa Henrique de Oliveira Ximenes, Konseleiru Embaixada Timor-Leste iha Indonézia Marcos da Costa, Diretór DNSPRS Helder Cosme Marçal Belo, Xéfi Gabinete Ministru Justisa Evangelino Belo no Assessor Gabinete Ministru Justisa Joaozito Viana.