DÍLI, MJ – S.E. Ministru Justisa Ivo Valente prezide Reuniaun Dala-Nen Konsellu Konsultivu Ministériu Justisa iha Sala Reuniaun Ministériu Justisa, Díli, loron Kinta-Feira (02/06/2016).

Konsellu Konsultivu Ministériu Justisa (KK-MJ) hanesan órgaun konsultivu ba asuntu organizasaun interna ne’ebé prezide hosi Ministru Justisa rasik. Reuniaun ne’e kompostu hosi; Diretór Nasionál sira, no mós servisu administrasaun direta no indireta Ministériu Justisa nian.

Ajenda reuniaun KK-MJ ida ne’e, aliénde diretór sira simu orientasaun hosi Ministru Justisa Ivo Valente, halo mós atualizasaun ba servisu sira ne’ebé diresaun sira hala’o ona iha fulan-Maiu nian. Inkluindu diskute planu servisu ba fulan-Juñu, halo aprezentasaun ba progressu ezekusaun orsamentu Ministériu Justisa áte fulan-Maiu 2016, tantu nia obstakulu sira no diskute medidas propiu hodi solusiona.

Iha ninia abertura reuniaun, Ministru Ivo hateten, “reuniaun ohin ne’e ho ajenda atu rona aprezentasaun progressu servisu kada diresaun idak-idak nian, sá obstakulu mak ita-bót sira hasoru, ezekusaun servisu la’o to’o ona iha ne’ebé, no kuandu sei iha buat balun ne’ebé ladun klaru bele koordena malu no tu’ur hamutuk hadia fila fali, nune’e servisu bele la’o ba oin nafatin tuir planu ne’ebé ita trasa tiha ona.”

“Hanesan diresaun ne’ebé foti parte iha atendimentu públiku nian, ema barak tau hela atensaun mak Diresaun Rejistu Notariadu (DNRN) ne’ebé konta kestaun passaporte, Bilhete Identidade (BI) no Sertidaun Nascimentu. Ha’u hakarak Señor Diretór aprezenta sá progressu servisu no dezafiu ne’ebé mak hasoru dadaun, ha’u rona ita komesa falta materiál produsaun, progressu supply ba materia ne’e oinsá ona. Nune’e mós kestaun rai, Diresaun Nasionál Terras no Propriedade (DNTP), dadaun halo hela jestaun rai Estadu, oinsá ho ninia lala’ok no prosesu arendamentu sira to’o iha ne’ebé ona, ezekusaun lei no obstakulu ne’ebé Señor Diretór hasoru, tanba ikus-ikus ne’e, ha’u rona kestaun rai sai polémika iha ita-nia sosiedade nia le’et,” husu Ministru Ivo Valente.

Atualizasaun planu hahú hosi Diretór DNRN Vitór da Costa Neto, nia esplika kona-ba servisu diáriu ne’ebé hala’o ona durante fulan-Maiu nian, prosesu kontatu ho kompañia hodi halo produsaun blanko passaporte komun, atendimentu offline ba BI, planu formasaun ba tékniku IT nian no direitu familiar nian, prosesu dezenvolvimentu passaporte-eletrónika, progressu produsaun BI, reseitas propiu ne’ebé Estadu simu ona áte fulan Maiu 2016, no seluk-seluk tán.

Depoiz-de aprezentasaun, Ministru Ivo Valente loke ba sujestaun sira, no mosu diskusaun lubuk ida kona-ba kestaun administrativu, prosedimentu aprovizionamentu, loke balkaun banku nian iha DNRN hodi fasilita prosesu pagamentu ba passaporte, no ikus meius koordenasaun sira hodi ezekuta Planu Asaun Anuál.

Diretór-Jerál Ministériu Justisa, halo intervensaun kona-ba mekanismu administrativa bainhira DNRN halo planu formasaun, no nia informa mós Kontratu Implementasaun ne’ebé hala’o ona ho instituisaun estranjeiru sira ba kapasitasaun funsionáriu públiku iha ámbitu Ministériu Justisa nian.

Tuir mai Diretór DNTP Romão Guterres aprezenta kona-ba lala’ok despeju administrativu nian, esplika mós prosesu sensiblizasaun ba proposta Lei Rai iha munisípiu no fatin-fatin risku konflitu, progressu levantamentu Sistema Nasionál Kadastru (SNK), kobransa reseitas sira hosi arendamentu rai Estadu nian, prosesu dezeñu estandarizasaun mapa, no planu formasaun ba funsionáriu DNTP.

Hanesan mós DNRN no DNTP, diresaun idak-idak, inklui Gabinete Diretór-Jerál no Gabinete Inspetór-Jerál halo aprezentasaun progressu servisu, no iha tempu mak hanesan Ministru Ivo sempre fó oportunidade ba feedback sira. Hanesan mós instituisaun tuteladu Ministériu Justisa nian; Defensoria Públiku, Polísia Sientifíku Investigasaun Kriminál (PSIK) no Centro Formação Jurídica (CFJ) halo mós aprezentasaun ba implementasaun atividade iha fulan kotuk, no kontinua informa planu ezekusaun ba fulan-Juñu nian.

Aprezentasaun hirak ne’e, hetan apresiasaun hosi Ministru Ivo Valente, nia enkoraja atu diretór sira kontinua servisu hamutuk no koordena didi’ak ba malun, hodi nune’e rezultadu programa Ministériu Justisa bele fó impaktu pozitivu ba ema barak.

Iha aprezentasaun ikus, Diretór Nasionál Administrasaun no Finansas (DNAF) Crisogno da Costa Neto aprezenta progressu ezekusaun orsamentu kada diresaun idak-idak nian, hosi nível ezekusaun atuál no komitmentu ne’ebé atinzi ona áte 31 Maiu 2016 tuir relatóriu freebalance Ministériu Finansas.

Iha ninia aprezentasaun, Diretór Crisogno hatudu panorama ezekusaun orsamentu hosi fulan-Janeiru to’o Maiu 2016, katak ezekusaun atuál no komitmentu Ministériu Justisa atinzi ona 46% ($9.368.619) hosi totál orsamentu hamutuk $20.232.900, ezekusaun ne’e inklui ona ho prosesu sira ne’ebé tama ona ba iha aprovizionamentu no hein halo pagamentu.

Reuniaun KK-MJ la’o vise-versa, ambiente rona malu no alista rekomendasaun lubun hodi hadia iha futuru. Reuniaun remata iha tuku 12:35 meudia oras Timor-Leste.

Partisipa iha reuniaun ne’e mak; Diretór-Jerál Henrique de Oliveira Ximenes, Xéfi Gabinete Ministru Justisa Evangelino Belo, Defensór Públiku-Jerál Sergio de Jesus Hornai, Inspetór GIA Lucas António da Costa, Diretór DNSPRS Helder Cosme Marçal Belo, Diretór DNAJL Interinu Pascoal da Costa, Xéfi Departementu PSIK Serpa Freitas, Diretóra CFJ Marcelina Tilman da Silva, Diretór DNRN Vitor da Costa Neto, Diretór DNAF Crisogno da Costa Neto, Diretór DNTP-SC Romão Guterres, Diretór DNDHC Interinu Francisco X.V. Soares, no assessor sira iha ámbitu Ministeriu Justisa.