DÍLI, CFJ - S.E. Ministru Justisa Ivo Valente halo vizita ba Guarda Prizionál sira ne’ebé tuir hela dadaun formasaun tékniku kona-ba servisu prizionál no reinsersaun sosiál iha Centro Formação Jurídica (CFJ), Kaikoli iha Díli, loron Segunda-Feira (30/05/2016).

Iha ninia vizita ne’e, Ministru Ivo koa’lia ho partisipante formasaun kona-ba importansia hosi formasaun tékniku, oinsá planu formasaun iha futuru no esforsu Governu nian hodi kontinua kapasita nafatin funsionáriu públiku sira, atu nune’e eleva sira-nia kapasidade no hadia dezempeñu servisu Guarda Prizionál sira.

“Formasaun ida ne’e importante tebes, aliénde hasa’e kapasidade no aprende deontolojia profesionál nian, hanesan mós obrigasaun funsionáriu públiku sira atu hetan formasaun no dezenvolvimentu minimu oras 40 iha tinan-ida ne’ebé haktuir iha artigu 13.c, Decreto-Lei Nº. 38/2012 kona-ba Rejime Formasaun no Dezenvolvimentu Funsaun Públika,” hateten Ministru Ivo Valente.

Ministru Ivo koa’lia liután katak,” sé Guarda Prizionál iha ona matenek no kapasidade, ha’u fiar katak ita-bót sira sei garante estabilidade servisu nian, tanba-ne’e, tenke iha nafatin vontade sakrifísiu no kontribui nafatin, pelumenus ita-bót sira bele kontribui ba iha dezenvolvimentu instituisaun prizaun nian."

Iha sorin seluk, Diretór DNSPRS informa katak, “formasaun ida ne’e partisipa 30 Guarda Prizionál no sira sei tuir formasaun durante semana-ne'en (6) hahú ona hosi loron 02 Maiu – 07 Juñu 2016 ho materias formasaun ne’ebé kobre profesionalizasaun ba Guarda Prizionál nian, nune’e bainhira remata formasaun, sira sei hala’o kna’ar ho di’ak hodi asegura seguransa prizaun no servisu reinsersaun sosiál nian.”

“Fundus ba formasaun ida ne’e finansia hosi Fundu Dezenvolvimentu Kapitál Umanu (FDKU), ho formadór sira mai hosi liña-ministériu sira, inklui mós ONG Nasionál no ájensia Internasionál sira ne’ebé mak durante ne’e fó sira-nia apoiu ba servisu prizionál no atendimentu prizionéiru sira,” dehan Diretór Helder.

Akompaña Ministru Justisa iha vizita ida ne’e, Diretór Nasionál Servisu Prizionál no Reinsersaun Sosiál (DNSPRS) Helder Cosme Marçal Belo, Xéfi Gabinete Ministru Justisa Evangelino Belo, Assessor Gabinete Ministru Justisa Joaozito Viana no Xéfi Departementu Prizionál nian.