DÍLI, CFJ – S.E. Ministru Justisa Ivo Valente abertura formasaun lideransa ba kargu xéfia ne’ebé organiza hosi Gabinete Diretór-Jerál Ministériu Justisa iha Centro Formação Jurídica (CFJ), iha Kaikoli Díli, loron Segunda-Feira (30/05/2016).

Formasaun lideransa kargu xéfia durante loron-rua (30-31/05) ne’e ho objetivu atu eleva koñesimentu diretór no xéfi departementu sira iha área lideransa nian, hodi nune’e kargu xéfia sira iha kualidade ukun, profesionál no iha responsabilidade ba kna’ar ne’ebé sira asume dadaun.

Iha ninia intervensaun, Ministru Ivo Valente hateten, “funsionáriu públiku iha ona padraun legál hodi determina idak-idak nia servisu loron-loron nian, maské ita aprende ona sistema administrasaun lubun ida hosi nasaun oin-oin; atravéz Portugál, Indonézia, Malázia, Mozambique no seluk-seluk tán, maibé padraun jerál funsionamentu públiku nian hanesan de’it.”

Ministru Ivo hatutan,“Hanesan líder ne’ebé asume kargu xéfia, tantu nasionál no munisípiu presiza hatene no aplika deontolojia profesionalizmu nian, tanba étika mak fundamenta ita idak-idak nia dever no regras profisaun nian. Regras ida ne’e konstitui ona iha Lei Funsaun Públika, no baze legál ba funsionáriu públiku hotu-hotu atu kumpri no hala’o.”

Relasaun ho formasaun lideransa ne’ebé organiza hosi Diresaun Jerál Ministériu Justisa, Ministru Ivo kongratula partisipante sira, no bolu atensaun atu kontinua aprende nafatin tanba programa ne’e reflete inisiativa di’ak, importante mak aplika tuir Timor nia nesesidade hodi hadia dezempeñu servisu loron-loron nian.

“Ita-bót sira simu ona formasaun barak, labele baruk atu aprende nafatin, importante mak bainhira simu ona formasaun ida ne’e, iha duni rezultadu ne’ebé fó impaktu ba ita-bót sira-nia dezempeñu servisu,” dehan Ministru Justisa.

Iha oportunidade ida ne’e, Ministru Ivo mós esplika kona-ba preparasaun rekursu umanus no realizasaun polítika desentralizasaun nian, avaliasaun dezempeñu, haforsa kontrollu internál no mós fó korajem ba funsionáriu públiku sira atu kuidadu sasan Estadu hodi nune’e bele garante sustentabilidade servisu instituisaun nian.

Marka prezensa iha abertura formasaun ida ne’e mak; Diretora Jerál Komisaun Funsaun Públika (KFP), Diretór-Jerál Ministériu Justisa, Inspetór-Jerál, Diretór no Xéfi Departementu sira hosi Nasionál no Munisípiu, Adjuntu Inspetór sira, Diretór PSIK, Diretora Centro Formasaun Jurídica no tékniku profesionál superiór sira iha ámbitu Ministériu Justisa.