DÍLI, DNSPRS - Ministériu Justisa liu hosi Diresaun Nasionál Servisu Prisionais no Reinsersaun Sosiál realiza reuniaun Konsellu Diretores Paíz sira Lingua Ofisiál Portugés (CPLP) kona-ba sistema servisu prisionais nian iha Hotel Beach Garden, Praia dos Queiros, Díli, loron 09 áte 10 fulan-Maiu 2016.

Reuniaun ne’ebé hala’o iha Hotel Beach Garden hola parte Diretores CPLP nian mak hanesan reprezentante hosi Timor-Leste, Angola, Brasil, Cabo Verde, Guiné-Bissau, Moçambique, Portugal no São Tomé e Príncipe.

Reuniaun durante loron rua ne’e, koalia kona-ba asuntu importante sira mak hanesan; kestaun funsionamentu Conselho Diretores, defini misaun no estrutura konsellu nian, inklui sistema prizionais iha kontextu reinsersaun sosiál no direitus umanus.

Iha loron ba da-uluk, Diretores da CPLP desidi Rejimentu Konselhu Diretores nian. Iha loron da-ruak, kada Diretores da CPLP aprezenta servisu kada paíz nia sistema prizionál nian ne’ebé liga ba iha reinsersaun sosiál no direitus umanus. Aliénde ida ne’e, Diretores da CPLP halo vizita mós ba iha Prizaun Becora hodi hare’e dereitamente sistema servisu prizionál Timor-Leste nian.

Iha biban ida ne’e, Diretór DNSPRS Sr. Helder Cosme Marçal Belo informa ba journalista Jornal Nacional Diário (10/05) katak, “objetivu hosi reuinaun ida ne’e mak; primeiru, halo diskusaun kona-ba Estatutu Konsellu Diretores Prizionál CPLP nian no defini funsionamentu konsellu ho nia misaun sira bazeia ba rekomendasaun Konferénsia Ministru Justisa Paíz Lingua Ofisiál Portugés iha tinan 2015 liubá hodi estabelese Konsellu Diretores Servisu CPLP. No segundu mak, diskute sistema no estratéjia prizionál nian iha kontextu reinsersaun sosiál no direitus umanus.”

Hafoin atu remata reuniaun iha loron Tersa-Feira (10/05), Diretór sira iha ámbitu CPLP deskute no asina ata reuniaun nu’udar dukumentu ofisiál.

Marka prezensa iha reuniaun ne’e mak; Diretór-Jerál Dr. Henrique de Oliveira Ximenes, Inspetór GIA Dr. Lucas António da Costa, Sub- Inspetór Dr. Jaime Maia, Sub- Inspetór Dr. Antonio Fatima, Diretór DNAJL Dr. Nelinho Vital, Diretór PSIK Dr. Vicente Fernandes e Brito, Adjunta-Prokuradora Dra. Zelia Trindade, Diretór Interinu CFJ Sr. Agapito da Cruz, Diretór DNAF Dr. Crisogno da Costa Neto, Diretór DNTP-SC Dr. Romão Guterres, Diretór DNDHC Dr. Flaviano Moniz Leão, Xéfi Gabinete Ministru Justisa Dr. Evangelino Belo, direjente sira hosi Diresaun Jerál no assessor sira.