DÍLI, MJ – S.E. Ministru Justisa Ivo Valente hato’o nia mensajem iha serimónia aniversáriu Polísia Sientifíku Investigasaun Kriminál (PSIK) ba Dala-Rua iha Auditóriu Ministériu Solidaredade Sosiál, iha Kaikoli Díli, loron Segunda-Feira (16/05/2016).

Aniversáriu PSIK ba tinan ida ne’e, marka mós serimónia fó-posse ba primeiru Adjuntu-Diretór PSIK Adino Nunes Cabral.

Serimónia aniversáriu PSIK hetan prezensa hosi S.E. Ministru Estadu, Koordenádór Asuntu Administrasaun Estadu no Justisa (MECAAEJ), Ministru Administrasaun Estatál Dionísio Babo Soares, P.hD., Prezidente Interina Tribunal Recurso, Juíza Konseleira Maria Natércia, Ministru Interiór Longuinhos Monteiro, Ministru Defeza Cirilio Cristovão, Prokuradora Angelina Saldanha, Komisáriu Funsaun Públika José Cristovão no Defensór Públiku-Jerál Sergio de Jesus Hornai.

Iha ninia mensajem, Ministru Ivo Valente expressa nia felicitações ba segundu aniversáriu PSIK nian ne’ebé monu iha loron 16 Maiu 2016.

“Ha’u hato’o ha’u-nia parabéns ba PSIK, maské foin tinan rua, Polísia Sientifíku Investigasaun Kriminál foti ona kna’ar signifikadu iha dezenvolvimentu instituisaun no funsionamentu administrasaun nian. Kapasidade tékniku sufisiente no sei dezenvolve nafatin tuir nesesidade servisu polisiál iha área luta hasoru krimi organizadu no komplexu, nune’e formasaun mós sei halo nafatin ba ita-nia investigadór sira, no ita sei esforsu atu kompleta ekipamentu servisu ivestigasaun ninian,” hateten Ministru Ivo.

Relasaun ho kooperasaun servisu PSIK ho instituisaun sira seluk hodi hasoru kriminalidade iha Timor-Leste, Ministru Ivo husu ba PSIK atu kontinua koopera ho Prokuradoria Jerál da Repúblika no Polísia Nasionál Timor-Leste (PNTL).

“Dezafiu ba PSIK iha oin sei barak tebes, aliénde ita sei falta infra-estrutura maibé importante tebes atu servisu hamutuk ho instituisaun relevante sira seluk, atu nune’e bele atinzi meta dezenvolvimentu nasionál,” dehan Ministru Ivo.

Iha sorin seluk, Ministru Estadu Dionísio Babo Soares hateten, “PSIK hare’e krimi komplexu ne’ebé aumenta loron ba loron, tanba-ne’e, PSIK presiza asaun inovativu, maneira oin-oin hasoru dezafiu sira hodi hasoru kriminalidade grave, organizadu no komplexu.”

“Tenke koopera ho instituisaun sira seluk hodi kombate kriminalidade iha ita-nia rai, no Governu kontinua apoiu ba fasilidade, laboratóriu ba interese investigasaun kriminál nian iha andamentu Ministériu Justisa nia okos,” dehan Ministru Estadu Dionísio Babo.

Diretór PSIK Vicente Fernandes e Brito iha oportunidade ida ne’e esplika mós kona-ba ezistensia no servisu PSIK nian, no importansia apoiu hosi parseiru dezenvolvimentu ba instalasaun ekipamentu no formasaun espesifíku.

“PSIK hari’i iha instituisaun Ministériu Justisa nia okos, durante tinan-rua ona, iha prosesu nia laran PSIK infrenta difikuldade barak, PSIK funsiona hala’o servisu investigasaun ba aktu kriminál sira; hanesan brankeamentu kapitais, drogas, falsifikasaun dokumentus, falsifikasaun moedas, tráfiku Umanu, prostituisaun no krimi organizadu sira seluk tán,” hateten Diretór Vicente Fernandes.

Serimónia Aniversáriu PSIK iha Auditórium Ministériu Solidaredade Sosiál partisipa mós parseiru dezenvolvimentu sira; Uniaun Europeia, korpu diplomátiku no Embaixadór sira, sosiedade sívil, Diretór Nasionál iha ámbitu Ministériu Justisa no mídia nasionál.