DÍLI, MJ – S.E. Ministru Justisa Ivo Valente hala’o reuniaun ho Kompañia GS – Construções ne’ebé responsabiliza konstrusaun Edifísiu foun Ministériu Justisa iha Sala Reuniaun Ministériu Justisa, Díli, loron Sexta-Feira (06/05/2016).

Reuniaun ne’ebé akompañadu hosi Diretór Nasionál Eletrisidade Ajénsia Dezenvolvimentu Nasionál (ADN) Sr. Miguel M. Monteiro de Jesus no Diretór Nasionál Administrasaun no Finansas (DNAF) Ministériu Justisa Sr. Crisogno da Costa Neto; diskute kona-ba avaliasaun finál ba projetu, defini kalendáriu ba inspesaun no mós teste finál ba ekipamentus sira antes halo serimónia entrega edifísiu foun hosi Kompañia GS – Construções ba iha Governu.

Iha abertura reuniaun ho GS – Construções, Ministru Ivo husu ba kompaña atu esplika situasaun ikus edifísiu nian to’o ona iha ne’ebé no bainhira mak halo inspesaun prelimináriu.

Kompañia GS – Construções esplika katak, edifísiu ne’e prontu ona atu uza, no nakloke ba inspesaun hosi ADN no Ministériu Justisa.

Ministru Ivo Valente dehan, “fizikamente, projetu Edifísiu Ministériu Justisa atinzi ona 100%, remata ona tuir relatóriu kompañia nian, maibé próxima semana sei halo lai teste téknika no inspesaun prelimináriu antes edifísiu ne’e entrega mai iha Ministériu Justisa.”

Iha sorin seluk, Diretór Miguel M. Monteiro husu atu Kompañia GS – Construções submete lalais dezeñu konstruídu edifísiu tomak no quantidade konstruídu ne’ebé aprovadu, hodi nune’e bele halo checklist, inklui teste komissionamentu bainhira halo inspesaun prelimináriu nian.

Hafoin atu remata reuniaun, Ministru Ivo Valente husu ba Ajénsia Dezenvolvimentu Nasionál no Diretór DNAF atu hare’e kestaun tékniku sira ho didi’ak, hare’e kestaun IT nian, eletrisidade, kanalizasaun bee-mós no seluk-seluk tán antes Ministériu Justisa simu edifísiu ne’e.