Manatuto - Ministériu Justisa (MJ) liu-hosi Diresaun Nasional Direitus Umanus no Cidadania (DNDHC) hala’o sosializasaun ba rekomendasaun Konvensaun Direitu Labarik iha Munisipiu Manatuto, loron Kuarta, 4 Maio 2016.
Timor-Leste adopta Konvensaun Direitu Labarik iha tinan 2003, nune’e hanesan estadu parte ba kovensaun ne’e iha obrigasaun hodi kria kondisaun tuir ejijensia ne’ebé define iha Konvensaun Direitu Labarik.
Xefe Departamentu Tratadus no Monitorizasaun Sr. Helder G. Martins ne’ebé representa Diretor DNDHC hatete katak objetivu prinsipal prenzensa iha ne’e hodi hala’o sosializasaun ba rekomendasaun konvensaun direitu labarik ne’ebé rekomenda hosi Komite Konvensaun Direitu Labarik iha Jenebra. Esforsu saida mak ita nia estadu halo ona presija mantein no ida ne’ebé mak sidauk presija buka meus hodi hala’o tuir nudar estadu parte ba konvensaun.

Sesaun ba loron ida tomak ne’e loke formalmente hosi reprezentante Administrador Munisipiu Manatuto, Sr Manuel Ximenes hatete, “ho naran Administrador Munisipiu Manatuto hau apresia ba ita bo’ot sira nia esforsu hodi sosializa direitu kriansa mai iha Manatuto, ita hotu tane direitu labarik no reforsa hatene kontiudu ne’e di-dia’k hodi fo protesaun ne’ebé dia’k liu tan tuir norma fundamental sira ne’ebé iha.”
Subtansia materia prinsipal ne’ebé sosializa mak hanesan, Prosesu halo Relatoriu Konvensaun Direitu Labarik, hato’o hosi Xefi Departementu Direitus Umanus, Vasco V. Soares. Rekomendasaun ba Konvensaun Direitu Labarik hato’o hosi Xefi Departementu Tratadus no Monitorizasaun, Helder G. Martins. Konvensaun Direitu Labarik, hato’o hosi Tekniku Superior, Carmelindo da Silva Caetano. Iha sesaun husu no hatan iha mós kolaborasaun hosi membru Komisaun Nasional Direitu Labarik, Teknika Superior, Madalena Guteres Correia, hodi responde pergunta ne’ebé husu hosi partisipante sira. Ba prosesu lalaok sesaun tuir ajenda fasilita hosi MC, Adriano B. Soares.

Sosializasaun ida ne’e partisipa hosi reprezentante Administrador Munisipiu Manatuto, Profesores, Pontu Vokal hosi Ministeriu Solidaridade Sosial, PNTL, Estudante, Sosiedade Sivil, Autoridade Lokal, Juventude no inklui membru komunidade balun. (C)